Në prag të sfidës me San Marinon, gjashtë lojtarë të Kombëtares rrezikojnë ndeshjen vendimtare ndaj Finlandës

Përtej vëmendjes së plotë të përqendruar te ndeshja e radhës ndaj San Marinos, stafi teknik i Kombëtares shqiptare, i kryesuar nga trajneri Rolando Maran, po bën llogaritë edhe për përballjet e muajit nëntor në kuadër të Ligës së Kombeve, me fokus të veçantë te dueli direkt kundër Finlandës që do të luhet në Tiranë. Kryetekniku i kuqezinjve është vënë në alarm për shkak të situatës së kartonëve të verdhë, pasi një numër i lartë lojtarësh rrezikojnë seriozisht pezullimin dhe mungesën në këtë takim kyç ndaj skuadrës skandinave. Bëhet fjalë për plot gjashtë futbollistë të rëndësishëm, të cilët nëse ndëshkohen me karton të verdhë gjatë sfidës së kësaj të marte kundër San Marinos, do të detyrohen të ndjekin nga tribuna ndeshjen e rëndësishme kundër finlandezëve. Lojtarët që rrezikojnë janë Berat Gjimshiti, Stavro Pilo, Ylber Ramadani, Kristjan Asllani, Anis Mehmeti dhe Myrto Uzuni. Vlen të theksohet se Asllani, Ramadani dhe Pilo ishin në të njëjtën situatë edhe para transfertave në Helsinki, pasi mbanin mbi vete barrën e ndëshkimit nga ndeshja e mëparshme me San Marinon. Një ndëshkim i mundshëm në duelin e së shtunës do t'i kishte liruar ata nga ky rrezik për dy ndeshjet përcaktuese të muajit nëntor ndaj Finlandës dhe Bjellorusisë, të cilat mbeten vendimtare për fatin e kuqezinjve në këtë edicion të Ligës së Kombeve.