Tahiri kërkon mbledhjen urgjente të Kuvendit: S’kemë asnjë informacion për seancë apo takime të reja

Deputeti i Aleancës për Ardhmërinë e Kosovës (AAK), Besnik Tahiri, ka bërë të ditur se deri më tani nuk ekziston asnjë njoftim zyrtar lidhur me planifikimin e ndonjë seance të re plenare apo takimesh konsultative. Në një prononcim për media, Tahiri u ka bërë thirrje forcave politike që të mblidhen sa më parë për të mundësuar votimin në lexim të dytë të Ligjit për Dhomat e Specializuara. Duke kujtuar zhvillimet e ditës vendimtare për zgjedhjen e presidentit, ai sqaroi se qëndrimi i tyre në sallë ishte bërë në bazë të një mirëbesimi të ndërtuar për kalimin e 22 pikave të rendit të ditës. “Ne kemi ndenjur në seancë duke pasur një besim të ndërsjellë se do t’i kalonim 22 pikat, e në fund të thuhet se nuk ka më seancë. Jemi këtu për të parë se cila është rruga dhe a ka kush brenda. Arsyeja pse ky votim duhet të ndodhë, për çdo njeri që ka një grimë logjike dhe mendon shqip, është se aty kemi katër burra që presin vetëm një dorë për të kaluar një ligj, për t'i dhënë shpresë se ky shtet u qëndron pranë në rrethana tejet të vështira”, u shpreh Tahiri, duke shtuar se për momentin nuk ka asnjë tendencë apo lëvizje drejt arritjes së ndonjë marrëveshjeje. Nga ana tjetër, ligjvënësi i AAK-së ka pranuar se partia e tij, në bashkëpunim me Partinë Demokratike të Kosovës (PDK), nuk i kanë numrat e mjaftueshëm të nënshkrimeve për të thërritur në mënyrë të pavarur një seancë të jashtëzakonshme të Kuvendit. “Për fat të keq, PDK-ja dhe Aleanca së bashku nuk i kanë 40 nënshkrime për të mundësuar thirrjen e seancës dhe për t'i detyruar deputetët të diskutojnë temën; ne i kemi vetëm 30 nënshkrime. Zotimi i djeshëm ka qenë i qartë. Seanca na ka ardhur me 22 pika, ndërsa është dashur të jetë vetëm me një pikë. Ne kemi qëndruar me bindjen se do të kryhen 22 pikat që më pas të kalojë ligji në lexim të dytë, përndryshe nuk do t'i bënim kuorumin qeverisë”, përfundoi ai.