Tensionet në Prishtinë: Policia ndërhyn me gaz lotsjellës dhe topa uji, lëndohen 6 policë dhe 11 protestues

Prishtinë, 5 tetor 2026 – Gjatë orëve të mbrëmjes pranë objekteve të Qeverisë dhe Kuvendit të Republikës së Kosovës, situata është tensionuar pasi një grup protestuesish kanë hedhur vazhdimisht mjete piroteknike, fishekzjarre dhe sende të forta në drejtim të institucioneve shtetërore. Për të vënë situatën nën kontroll dhe për të parandaluar përshkallëzimin e dhunës, Policia e Kosovës është detyruar të ndërhyjë duke përdorur pajisjet zyrtare, përfshirë gazin lotsjellës dhe topat e ujit për shpërndarjen e turmës. Për arsye sigurie dhe për të mbrojtur pjesëmarrësit në trafik, autoritetet policore kanë bllokuar përkohësisht qarkullimin e automjeteve në disa akse rrugore rreth qendrës së kryeqytetit, ku po zhvillohej tubimi. Si pasojë e moszbatimit të thirrjeve të njëpasnjëshme për qetësi dhe e veprimeve në kundërshtim me ligjin, tre persona janë shoqëruar në stacionin policor, ndërsa veprimet e mëtejme ndaj tyre do të koordinohen me organet e drejtësisë. Në bazë të të dhënave të deritanishme, nga sulmet e drejtuara ndaj objekteve shtetërore dhe zyrtarëve policorë gjatë detyrës, gjashtë efektivë të Policisë së Kosovës kanë pësuar lëndime trupore dhe kanë marrë ndihmën e nevojshme mjekësore. Po ashtu, ndihmë mjekësore kanë kërkuar edhe 11 qytetarë pjesëmarrës në protestë, shifra këto që mund të përditësohen në varësi të zhvillimeve në terren. Nga Policia e Kosovës theksohet se nuk është ndërmarrë asnjë veprim ndaj qytetarëve që kanë protestuar në mënyrë të qetë dhe demokratike, por ndërhyrja ka qenë e pashmangshme vetëm ndaj atyre që kanë shfaqur akte dhune. Forcat e rendit kanë apeluar vazhdimisht përmes thirrjeve publike dhe komunikimit të drejtpërdrejtë që tubimet të mbahen brenda kornizave ligjore. Megjithëse protesta ka vijuar edhe në orët e vona të mbrëmjes, situata aktuale paraqitet e qetë. Pjesëtarët e Policisë së Kosovës do të vazhdojnë të qëndrojnë në gatishmëri në terren për të garantuar rendin, sigurinë publike, mbrojtjen e pronës publike e private dhe mbarëvajtjen e qetë të gjithë procesit.