Përplasjet në tubimin e mbrëmshëm, Endrit Thaçi: E papranueshme që ekzekutivi sulmon veteranët dhe fëmijët e dëshmorëve

Endrit Thaçi, djali i ish-presidentit Hashim Thaçi, ka reaguar ashpër lidhur me incidentet e regjistruara gjatë protestës së mbrëmshme, e cila u zhvillua pranë ndërtesës së Kuvendit për të kërkuar miratimin në lexim të dytë të Ligjit për Gjykatën Speciale. Përmes një deklarate publike, ai i ka quajtur “të turpshme” ndërhyrjet e forcave të rendit ndaj qytetarëve pjesëmarrës në tubim, duke drejtuar akuza të drejtpërdrejta ndaj qeverisë aktuale. “Në periudhat më sfiduese, i gjithë kombi ynë qëndroi krah UÇK-së. Është e turpshme që sot, në kohën e lirisë së fituar pikërisht nga Ushtria Çlirimtare, të ballafaqohemi me një qeveri që ushtron dhunë ndaj veteranëve dhe fëmijëve të dëshmorëve. Një tradhtim i tillë nuk do të harrohet kurrë”, u shpreh ndër të tjera Thaçi. Në përmbyllje të reagimit të tij, ai u bëri thirrje qytetarëve që të bashkohen masivisht edhe në protestën e re të thirrur për ditën e sotme, e cila është parashikuar të nisë duke filluar nga ora 12:00.