“Kërkoni llogari për votën tuaj” – Agon Batusha shënjestron deputetët e PDK-së për Gjykatën Speciale

Përfaqësuesi i Lëvizjes Vetëvendosje, Agon Batusha, ka reaguar ashpër ndaj qëndrimeve të fundit të deputetëve të Partisë Demokratike të Kosovës lidhur me Gjykatën Speciale. Në shënjestër të kritikave të tij kanë qenë ligjvënësit Enver Hoxhaj dhe Blerta Deliu, të cilëve u ka përmendur faktin se dikur kanë ngritur kartonët jeshilë për themelimin e kësaj gjykate, duke hedhur dyshime mbi sinqeritetin e deklaratave të tyre të tanishme. Sipas Batushës, dyshja në fjalë duhet t'i nënshtrohet vetëkritikës para se të lëshojë akuza në drejtim të të tjerëve. Ai ka vënë in-focus deklaratën e Hoxhait, i cili vendimin e dikurshëm e ka quajtur “gabim fatal”, duke shtruar pyetje të drejtpërdrejta mbi llogaridhënien politike dhe morale. “Nëse pranohet se ky ka qenë një gabim, pyetja shtrohet natyrshëm: ku mbeti përgjegjësia personale dhe dorëheqja morale?”, ka theksuar ai, duke shtuar se nuk mund të votohet një nismë e tillë, të pranohet dështimi më vonë dhe më pas të pretendohet udhëheqja e proceseve politike duke ia hedhur fajin palëve të tjera. Po ashtu, Batusha ka ndalur vëmendjen te aspekti i protestave dhe thirrjeve publike, duke ngritur dilemën se pse nuk kërkohet llogari pikërisht nga ata që i dhanë jetë Gjykatës Speciale me votën e tyre në Kuvend. Ndërsa e ka cilësuar protestën si të drejtë legjitime, ai ka përfunduar se përgjegjësia duhet të kërkohet aty ku janë marrë vendimet, duke mos u fshehur pas gishtit dhe pa dhënë llogari paraprakisht për veprimet e tyre parlamentare.