Usha Vance rrezikon rrëzimin me foshnjën në krahë: Detaji që tërhoqi vëmendjen te ushtarët gjatë nisjes drejt Alaskës

Një moment tensioni ka shoqëruar nisjen e familjes së zëvendëspresidentit amerikan, J.D. Vance, drejt Alaskës. Bashkëshortja e tij, Usha Vance, ka pësuar një incident të vogël por shqetësues sapo ka mbërritur në Bazën e Përbashkët Andrews, nga ku do të nisej fluturimi. Teksa po zbriste shkallët e helikopterit ushtarak me djalin e saj të sapolindur, Alec, të vendosur në një mbajtëse foshnjash, Zonja e Dytë e SHBA-së ka humbur ekuilibrin për një moment. Fatmirësisht, ajo ka arritur të mbahet shpejt te parmakët e shkallëve, duke shmangur një rrëzim që mund të ishte i rëndë. Si ajo, ashtu edhe foshnja, shpëtuan pa asnjë lëndim. Megjithatë, ajo që ka shkaktuar diskutime të shumta në rrjetet sociale ishte sjellja e katër ushtarëve të rreshtuar pranë helikopterit. Pavarësisht situatës së rrezikshme ku ndodhej Usha Vance me foshnjën në krahë, asnjëri prej tyre nuk bëri asnjë lëvizje apo përpjekje për t'i ardhur në ndihmë. Vetëm pak sekonda pas këtij momenti, nga i njëjti helikopter ka zbritur edhe zëvendëspresidenti J.D. Vance, i cili mbante në krahë vajzën e tyre katërvjeçare, Mirabelle. Ky udhëtim i familjes Vance drejt Alaskës po realizohet në kuadër të mbështetjes që zëvendëspresidenti po jep për fushatën elektorale të senatorit Dan Sullivan. Për Usha Vance, ky udhëtim ka një rëndësi të veçantë, pasi Alaska shënon shtetin e 50-të amerikan që ajo viziton. Para nisjes, J.D. Vance kishte ndarë me publikun detaje nga ky udhëtim sfidues familjar: "Siç mund ta keni parë, Usha dhe disa nga fëmijët do të na shoqërojnë. Ky është shteti i 50-të që viziton Usha, ndaj po marrim me vete një foshnjë nëntëjavëshe në një fluturim prej 7.5 orësh drejt Alaskës". Ai shtoi me humor se nëse gjatë fjalimit të tij do të dukej i lodhur apo i tensionuar, fajin për këtë do ta kishte pikërisht udhëtimi i gjatë me foshnjën. Alec, i cili erdhi në jetë më 19 korrik në Qendrën Mjekësore Ushtarake Kombëtare Walter Reed në Maryland, është fëmija i katërt i çiftit Vance. Lindja e tij shënon një ngjarje të rrallë historike, pasi ai është fëmija i parë i lindur nga një zëvendëspresident amerikan në detyrë që prej vitit 1870.