Thirrja e prerë e Vlora Çitakut për Albin Kurtin: Eja në Kuvend të votojmë ligjin, ndalo tensionet dhe dhunën

Deputetja e Partisë Demokratike të Kosovës, Vlora Çitaku, i ka bërë një thirrje të hapur dhe të drejtpërdrejtë kryeministrit Albin Kurti, duke i kërkuar që të paraqitet në seancën e Kuvendit për të votuar ligjin. Përmes një reagimi në profilin e saj zyrtar në rrjetin social Facebook, Çitaku ka theksuar se situata aktuale nuk toleron përplasje dhe tensione, por kërkon maturi, qetësi dhe vendosmëri politike. Në mesazhin e saj drejtuar kreut të ekzekutivit, ajo ka kërkuar të shmanget çdo provokim apo nxitje, duke bërë thirrje që policia të mos përdorë forcë ndaj të rinjve që po protestojnë në sheshe për të kërkuar drejtësi për vlerat që sollën lirinë e vendit. Sipas saj, kryeministri e ka për detyrë të jetë në parlament, të dëgjojë zërin e qytetarëve dhe të votojë. Çitaku ka nënvizuar se ky proces nuk ka të bëjë me interesa partiake, emra të përveçëm apo mandate politike, por lidhet drejtpërdrejt me historinë e Kosovës, dinjitetin e atyre që luftuan për liri dhe të ardhmen e brezave të rinj. Në përmbyllje të reagimit të saj, deputetja e PDK-së ka rikujtuar se vlera e Ushtrisë Çlirimtare të Kosovës (UÇK) është ajo që duhet t'i bashkojë të gjithë, sot më shumë se kurrë.