E ardhmja e pasigurt te Barcelona: Alejandro Balde mund të kërkojë largimin në janar

Klubi katalunas rrezikon të përballet me një largim të papritur gjatë merkatos së dimrit, pasi futbollistët që po aktivizohen më pak nën urdhërat e trajnerit Hansi Flick mund të kërkojnë ndryshimin e ambientit për të siguruar minuta shtesë. Një ndër rastet më të komentuara dhe që pritet të ndiqet me vëmendje të madhe është ai i Alejandro Baldes. Mbrojtësi i majtë ishte pranë largimit edhe në afatin kalimtar veror, mirëpo në fund zgjodhi të qëndronte në “Spotify Camp Nou” për të provuar veten dhe për të fituar një vend stabël në formacionin bazë. Gjatë verës, përfaqësuesit e Manchester Unitedit kishin shfaqur interesim konkret për futbollistin, por vetë lojëtari spanjoll vendosi që ta refuzonte mundësinë e transferimit dhe të mbetej pjesë e gjigantit katalunas. Megjithatë, zhvillimet e deritanishme në fushë nuk kanë përmbushur aspak pritshmëritë personale të lojëtarit për këtë edicion futbollistik. Nga tetë takimet zyrtare që Barcelona ka zhvilluar deri më tani, Flick e la atë jashtë skuadrës në ndeshjen e parë, kurse në përballjen kundër Racing Santanderit i besoi vetëm 12 minuta lojë, në një moment kur fati i sfidës kishte marrë fund. Pozita e Baldes është vështirësuar ndjeshëm, pasi Xavi Espart – pavarësisht se është natyralisht mbrojtës i djathtë – ka fituar besimin e teknikut gjerman dhe është aktivizuar në krahun e majtë të prapavijës. Konkurrenca në këtë repart shtohet edhe nga prania e Joao Cancelos, i cili u rikthye përfundimisht te Barcelona gjatë verës pas aventurës si i huazuar dhe ndërprerjes së bashkëpunimit me Al-Hilal. Në rast se Alejandro Balde do të vendosë përfundimisht largimin në janar, drejtuesit e Barcelonës pritet të analizojnë mundësinë e afrimit të një qendërmbrojtësi të ri. Ky është një repart për të cilin trajneri Flick kishte kërkuar përforcime që në merkaton e verës, ndërsa nevoja për ndërhyrje është bërë edhe më e ngutshme pas dëmtimit të pësuar nga Andreas Christensen.