Uashingtoni jep dritën jeshile: Paketë e re armatimesh prej 2.27 miliardë dollarësh për Egjiptin, Kuvajtin dhe Emiratet

Departamenti Amerikan i Shtetit ka dhënë miratimin zyrtar për tri marrëveshje të mundshme të shitjes ushtarake, të cilat synojnë Egjiptin, Kuvajtin dhe Emiratet e Bashkuara Arabe, me një vlerë totale të llogaritur në afro 2.27 miliardë dollarë. Kontrata më e madhe e kësaj serie i përket Emirateve të Bashkuara Arabe, ku përfshihen pjesët udhëzuese për Sistemin e Armëve Vrasëse me Precizion të Avancuar-II dhe logjistika përkatëse, vlera e së cilës llogaritet në 1.041 miliardë dollarë, bëhet e ditur në njoftimin zyrtar të departamentit. Sipas të dhënave, autoritetet në Emiratet e Bashkuara Arabe kanë shprehur interesimin për të siguruar deri në dhjetë mijë pjesë udhëzuese të këtij sistemi, që përfshijnë opsione si për konfigurimet ajër-ajër, ashtu edhe për ato ajër-tokë. Ndërkohë, për sa i përket Egjiptit, Uashingtoni ka miratuar mundësinë e blerjes së sistemeve të raketave Javelin, me një kosto të parashikuar që kap shifrën e 832 milionë dollarëve. Në kuadër të kësaj kërkesë, Kajro synuje të pajiset me deri në 2,020 raketa Javelin FGM-148F – duke përfshirë edhe 20 të tilla për fluturim provë – si dhe deri në 200 Njësi Lansimi Komando të Lehta Javelin. Sa i takon Kuvajtit, administrata amerikane ka aprovuar një transaksion të mundshëm për shërbimet e riparimit, rikthimit të raketave Patriot dhe pajisjeve mbështetëse, me një vlerë të vlerësuar prej 400 milionë dollarësh. Këto lëvizje vijnë më shumë se shtatë muaj pas nisjes së konfliktit me Iranin, i cili shpërtheu më 28 shkurt kur Shtetet e Bashkuara dhe Izraeli ndërmorën sulme të bashkërenduara kundër vendit. Si kundërpërgjigje, Teherani ndërmori sulme ndaj objekteve dhe bazave amerikane të vendosura në Bahrein, Katar, Emiratet e Bashkuara Arabe, Kuvajt, Jordani dhe Arabinë Saudite. Edhe pse SHBA-ja dhe Irani arritën të nënshkruanin një marrëveshje kornizë gjatë muajit qershor, e cila parashikonte hapat urgjentë për të garantuar sërish lirinë e lundrimit përmes Ngushticës së Hormuzit dhe për të trajtuar çështjen e programit bërthamor iranian, afati i saj skadoi në gusht pa arritur një akord përfundimtar.