Tensione në Prishtinë, OVL-UÇK i kërkon Policisë të ndalë dhunën ndaj qytetarëve dhe fëmijëve të dëshmorëve

Organizata e Veteranëve të Luftës së UÇK-së ka lëshuar një reagim të ashpër pas incidenteve dhe tensioneve të shënuara gjatë protestës së zhvilluar pranë institucioneve shtetërore në Prishtinë, duke i kërkuar strukturave të Policisë së Kosovës që të frenojnë menjëherë përdorimin e forcës. Përmes një prononcimi zyrtar të bërë publik gjatë zhvillimit të tubimit, kjo organizatë u ka bërë apel forcave të rendit që të tregojnë maturi dhe të mos ushtrojnë dhunë ndaj fëmijëve të dëshmorëve, invalidëve, veteranëve dhe qytetarëve të thjeshtë. “Polici, e dimë që jeni me urdhër dhe se po zbatoni urdhra. Por mbani duart larg fëmijëve të dëshmorëve, invalidëve, veteranëve dhe qytetarëve të këtij vendi”, theksohet në mesazhin e OVL-UÇK-së. Organizata ka kërkuar ndalimin e asaj që e ka cilësuar si sjellje të dhunshme dhe të paprovokuar nga ana e efektivëve, duke qartësuar se revolta e tyre nuk është e orientuar kundër punonjësve të policisë. “Ne nuk kemi punë me ju. Kemi punë me përfaqësuesit e popullit dhe kërkojmë që ata të mbajnë përgjegjësi për veprimet e tyre”, vijon më tej reagimi i tyre. Në mbyllje të këtij qëndrimi, OVL-UÇK ka bërë thirrje që uniforma shtetërore e policisë të mos shërbejë si instrument presioni apo dhune ndaj qytetarëve, në një kohë kur situata në terren është karakterizuar nga përplasje dhe ndërhyrje të forcave të sigurisë.