“Gjykim i ashpër”: Çlirim Haziri e etiketon ministrin Sveçla si “qyqar” pas incidenteve para Kuvendit

Çlirim Haziri, i biri i heroit të zhdukur Xhavit Haziri, ka lëshuar akuza të rënda në drejtim të ministrit të Punëve të Brendshme, Xhelal Sveçla, pas situatës së tensionuar të regjistruar ditën e sotme në afërsi të ndërtesës së Kuvendit të Kosovës. Gjatë reagimit të tij, Haziri ka shprehur indinjatë të thellë ndaj kreut të resortit të sigurisë, duke pretenduar se ai mban një post i cili është fituar përmes sakrificës dhe gjakut të dëshmorëve të kombit. “Ai Xhelal që sot rri ulur në kolltukun që u ngrit mbi gjakun e dëshmorëve, sot na goditi, na gjuajti, para familjeve tona, para nanave tona, para grave tona e iku me bisht, ashtu siç është, si qyqar”, ka deklaruar ndër të tjera Haziri.