Prapaskenat e takimit Kurti-Hamza, Deliu: Kryeministri bëri Pazar me votën për presidentin dhe Ligjin e Speciales

Deputetja e Partisë Demokratike të Kosovës, Blerta Deliu, ka bërë publike detaje nga takimi mes kryeministrit Albin Kurti dhe Bedri Hamzës, duke e akuzuar kreun e ekzekutivit për vendosjen e kushteve politike. Sipas saj, kreu i qeverisë ka kushtëzuar sigurimin e votave për zgjedhjen e presidentit me miratimin e Projektligjit për ndryshimet në Ligjin për Gjykatën Speciale. "Votoma Presidentin, ta votoj ligjin", a ka shprehje ma të qartë të pazarit me kauzën e çlirimtarëve? Po thoni se UÇK-ja është e të gjithëve", ka shkruar Deliu në rrjetin social Facebook. Më tej, ajo ka ngritur pyetje mbi këtë qasje, duke kërkuar llogari se përse mbështetja për këtë projektligj lidhet ngushtë me përfitimet politike personale. "Atëherë pse vota juaj për ligjin varet prej asaj çka merrni për vete? Nëse UÇK-ja është e të gjithëve, edhe përgjegjësia është e të gjithëve. Votojeni ligjin pa ia vu çmimin", ka përfunduar reagimin e saj deputetja e PDK-së.