Talenti shqiptar thyen rekordin në Danimarkë, vlera e tij kap shifrën 4 milionë euro

Olti Hyseni po konfirmon formën e tij të shkëlqyer në futbollin danez, duke shënuar një rritje të ndjeshme në karrierë. Sulmuesi i majtë, vetëm 19 vjeç, ka regjistruar një rritje të jashtëzakonshme në tregun e transferimeve, ku vlera e tij e kartonit ka arritur në kuotën e 4 milionë eurove. Për t'i dhënë përmasa këtij suksesi, vlera e tij e mëparshme llogaritej në 2,5 milionë euro, që do të thotë një rritje prej 1,5 milionë eurosh. Ky zhvillim e pozicionon Hysenin në vendin e parë si futbollisti më i vlerësuar në radhët e klubit të Brondbit. Kujtojmë se gjatë merkatos së verës, Brondbi investoi plot 4 milionë euro për të siguruar shërbimet e tij nga skuadra rivale Sonderjyske, një lëvizje që tashmë po dëshmohet si një investim tejet i qëlluar nga drejtuesit e klubit. Përveç cilësive në fushë, Hyseni zotëron edhe pasaportën e Kosovës, ndërsa së fundmi ishte protagonist me Kombëtaren e Danimarkës U-20, ku arriti të shënojë një gol spektakolar ndaj bashkëmoshatarëve të Brazilit U-20. Nëse institucionet e futbollit të Kosovës apo Shqipërisë nuk reagojnë shpejt për ta bindur talentin, rreziku që ai të afronjë me fanellën e Kombëtares A të Danimarkës mbetet tejet i lartë.