Ramush Haradinaj konfirmon se AAK-ja do të votojë ndryshimet për Dhomat e Specializuara

Kryetari i Aleancës për Ardhmërinë e Kosovës, Ramush Haradinaj, ka bërë të ditur se subjekti politik që ai drejton do të mbështesë me votë nismën për ndryshimet në Ligjin për Dhomat e Specializuara. Ndonëse sipas tij heqja dorë nga kjo gjykatë do të përbënte një kundërpërgjigje adekuate ndaj padrejtësive dhe fyerjeve që i janë bërë vendit, Haradinaj theksoi se Aleanca do t'i qëndrojë pas projektligjit që gjendet aktualisht në shqyrtim para deputetëve të Kuvendit të Kosovës. Gjatë fjalës së tij, ai ka bërë thirrje që ky projektligj të kalojë procedurat e votimit gjatë ditës së sotme, duke kërkuar miratimin e tij edhe në lexim të dytë. “Rrugëtimin tonë deri këtu e kemi bërë edhe me gabime, por fajin duhet ta gjejmë te vetja, sepse vetëm ne mbajmë përgjegjësi për fatin dhe të vërtetën tonë”, u shpreh Haradinaj para gazetarëve.