Zbulim sensacional në Strugë: Arkeologët nxjerrin në dritë një varr luftëtari të shekullit të VI para Krishtit me ar dhe armë të lashta

Një ekspeditë arkeologjike ka sjellë në vëmendje një zbulim të jashtëzakonshëm në lokalitetin Rasnica, pranë fshatit Koroshishtë të Strugës. Bëhet fjalë për një varr të pasur ushtarak të datuar në shekullin e 6-të para Krishtit, brenda të cilit janë gjetur armë autentike, si dhe artefakte të çmuara të punuara nga ari, bronzi dhe qelibari. Ky gjetje e re përforcon përfundimisht tezën se zona e Rasnicës paraqet një nekropol të rëndësishëm që i përket periudhës arkaike. Detajet e plota të këtij zbulimi pritet të bëhen publike gjatë pasdites së sotme në kuadër të një konference për shtyp që do të mbahet në qytetin e Ohrit. "Hulumtimet e këtij sezoni kanë rezultuar me një zbulim spektakolar, konkretisht një varrim elitar ushtarak të pajisur me arsenal të plotë luftarak, ku përfshihen përkrenarja, mburoja, shpata, shtizat, krahas objekteve të ndryshme nga ari, bronzi, qelibari dhe materiale të tjera," thuhet në njoftimin zyrtar të Muzeut. Institucioni muzeor thekson se këto rezultate të fundit kanë një peshë të veçantë shkencore, pasi konfirmojnë pa ekuivok karakterin e Rasnicës si nekropol i periudhës arkaike. Kjo hap horizonte të reja për hulumtimin e riteve të varrimit, organizimit ushtarak e shoqëror, si dhe të elitave që kanë dominuar në pellgun e Ohrit dhe Strugës gjatë shekullit të 6-të para Krishtit. Lokaliteti i Rasnicës u vu në qendër të vëmendjes së opinionit publik pëjatë vitit 2024, periudhë kur gërmimet shkencore sollën në dritë një kompleks varrimi monumental, i shoqëruar me një inventar jashtëzakonisht të pasur arkeologjik.