Kuvendi i Kosovës voton njëzëri kalimin e procedurave të përshpejtuara për Ligjin e Speciales

Kuvendi i Kosovës ka ndërmarrë një hap të shpejtë legjislativ, duke miratuar me 90 vota pro dhe pa asnjë votë kundër shmangien e afateve dhe procedurave të rregullta parlamentare. Ky vendim i hap rrugë shqyrtimit të parë të Projektligjit që synon ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar. Kjo nismë erdhi pas propozimit të shefes së Grupit Parlamentar të Lëvizjes Vetëvendosje, Arbërie Nagavci, e cila kërkoi që ky shqyrtim i parë të zhvillohet menjëherë gjatë seancës së jashtëzakonshme të thirrur për këtë qëllim, duke anashkaluar hapat e zakonshëm burokratikë të kuvendit. “Propozojmë që shqyrtimi i parë i këtij ligji të bëhet në seancën e jashtëzakonshme, pra sot”, u shpreh Nagavci gjatë seancës plenare. Nga ana e tij, deputeti i Partisë Demokratike të Kosovës, Përparim Gruda, ka dhënë sqarime të detajuara rreth natyrës së këtyre ndryshimeve. Sipas tij, nisma nuk cenon kompetencat e Gjykatës Speciale për të hetuar dyshimet mbi trafikimin e organeve, por fokusohet te transferimi i gjykimit të krimeve të luftës brenda territorit të Kosovës. “Ky ligj nuk ia heq të drejtën Gjykatës Speciale për të trajtuar rastet që kanë të bëjnë me trafikimin e organeve, por i heq një pjesë të juridiksionit të Dhomave të Specializuara, atë që ka të bëjë me krimet e luftës. Ajo mund të vazhdojë me hetimet për trafikimin e organeve. Kosova nuk do ta ndryshojë Kushtetutën e saj dhe nuk do të prishë marrëveshjet ndërkombëtare që kemi me Holandën. Ajo që bëjmë është që krimet e luftës të zhvendosen për t’u gjykuar në Kosovë. Ligji i bart këto kompetenca për të gjitha rastet e ardhshme. Për ish-krerët, nëse do të ketë rast në Gjykatën Supreme, ai do të zhvillohet në Kosovë”, theksoi Gruda. Procedura e shmangies nga afatet zyrtare është e bazuar në dispozitat e Rregullores së Kuvendit. Ndërkohë, bëhet e ditur se ky projektligj kishte marrë më parë mbështetjen në parim nga Komisioni për Legjislacion.