Iniciativa e PDK-së në Kuvend: Synohet kufizimi i juridiksionit të Gjykatës Speciale për krimet e luftës

Në seancën e jashtëzakonshme të Kuvendit të Kosovës, e cila ka nisur punimet, deputeti Përparim Gruda ka marrë fjalën si propozues i Projektligjit për ndryshimin dhe plotësimin e Ligjit për Dhomat e Specializuara. Duke folur në emër të grupit parlamentar të Partisë Demokratike të Kosovës, Gruda ka paraqitur pikat kryesore të këtij projektligji, duke kujtuar se rrugëtimi i Gjykatës Speciale në Hagë është tashmë i njohur gjerësisht për opinionin vendor. Ai theksoi se kjo gjykatë u formua bazuar në pretendimet e ngritura në raportin e Dick Martyt, ndërsa proceset gjyqësore gjashtëvjeçare ndaj ish-udhëheqësve të Ushtrisë Çlirimtare të Kosovës nuk kanë arritur të vërtetojnë akuzat për trafikim organesh. Sipas Grudës, nisma e ndryshimeve ligjore nuk e privon Gjykatën Speciale nga e drejta për të vijuar hetimet lidhur me pretendimet për trafikim organesh, por ka për qëllim heqjen e një pjese të juridiksionit të saj që i referohet krimeve të luftës. "Për gjithë opinionin publik të Kosovës është e njohur historia e Gjykatës Speciale në Hagë. Ajo u themelua mbi pretendimet e raportit të Asamblesë Parlamentare të Këshillit të Evropës, të paraqitur nga Dick Marty, që në thelb kishte akuza për trafikim të organeve nga UÇK-ja. Procesi gjashtëvjeçar i gjykimit të krerëve të UÇK-së në Hagë, akuzat dhe vendimet e shkallës së parë, nuk e kanë vërtetuar… se kishte trafikim të organeve. Ky ligj nuk ia heq të drejtën Gjykatës Speciale për të vazhduar hetimin e akuzës për trafikim të organeve, por ky ligj bën vetëm një gjë, e heq një pjesë të juridiksionit të Gjykatës Speciale, atë që ka të bëjë me krimet e luftës," u shpreh ai. Në fund, ai bëri të ditur se Gjykata Speciale do të vazhdojë të funksionojë për misionin për të cilin u themelua fillimisht, ku përfshihet edhe shqyrtimi i pretendimeve për trafikim organesh.