Zhvillime në PDK: Hamza mbledh Kryesinë dhe deputetët pas takimeve me Kurtin

Kryetari i Partisë Demokratike të Kosovës, Bedri Hamza, ka thirrur sot një mbledhje urgjente të strukturave më të larta partiake, e cila do të nisë në orën 14:00. Në këtë tubim janë ftuar anëtarët e Kryesisë dhe deputetët e Grupit Parlamentar të këtij subjekti politik. Sipas burimeve brenda partisë, fokusi kryesor i këtij takimi pritet të jetë informimi i detajuar i strukturave drejtuese rreth bisedimeve që kreu i PDK-së ka zhvilluar së fundmi me kryeministrin në detyrë dhe liderin e Lëvizjes Vetëvendosje, Albin Kurti. Temë qendrore e këtyre diskutimeve mes dy liderëve mësohet se ka qenë nisma për ndryshimin e Ligjit për Dhomat e Specializuara.