Interes masiv për “Flamingo Mirror”, Rama: Platforma përballoi suksesshëm dhjetëra sulme kibernetike

Platforma e re dixhitale “Pasqyra e Flamingos” (Flamingo Mirror) ka shënuar një nisje të bujshme, duke regjistruar shifra të larta interesi dhe trafiku që në ditën e saj të parë të funksionimit zyrtar. Të dhënat zyrtare u bënë të ditura nga kryeministri Edi Rama, i cili theksoi se gjatë 24 orëve të para të aktivizimit, sistemi ka shënuar mbi 127 mijë kërkime totale, ndërsa mesatarisht janë regjistruar rreth 3,397 kërkime për secilën faqe. Gjithashtu, gjatë kësaj periudhe, platforma ka pranuar 49 pyetje të reja nga përdoruesit. Krahas interesit të lartë qytetar, kreu i qeverisë bëri me dije se sistemi ka qenë shënjestër e sulmeve kibernetike, por ato janë neutralizuar me sukses. Sipas tij, janë evidentuar 122 sulme të tilla të ardhura nga 32 adresa të huaja, të cilat janë zmbrapsur plotësisht pa shkaktuar asnjë dëm teknik. Në reagimin e tij publik, kryeministri Rama e ka cilësuar këtë nisje si fillimin e një etape të re të transparencës qeverisëse, duke e vendosur atë në kontrast me atë që ai e quajti “llumi anti-shtet i kanaleve sociale”, në një përballje të hapur mes fakteve zyrtare dhe dezinformimit.