Formacion i ndryshuar i Kosovës ndaj Austrisë: Foda lë jashtë tre titullarë të ndeshjes me Izraelin

Përfaqësuesja e Kosovës do të paraqitet me risi në përbërje për sfidën e sotme kundër Austrisë, e cila do të luhet në stadiumin “Fadil Vokrri”, teksa synimi mbetet vazhdimësia e rezultateve të favorshme para fansave vendas. Selektori Franco Foda ka vendosur të bëjë ndryshime rrënjësore, duke lënë në bankinë tre lojtarë që e nisën nga minuta e parë takimin e fundit kundër Izraelit. Bëhet fjalë për Dion Kacurin, Muharrem Jasharin dhe Milot Avdylin, të cilët kësaj radhe nuk do të bëjnë pjesë në 11-shen startuese të “Dardanëve”. Pavarësisht se të tre futbollistët morën hapësirë në fushë ndaj izraelitëve, tekniku gjerman ka preferuar alternativa të tjera për këtë përballje, e cila paralajmërohet të jetë dukshëm më sfiduese për ekipin kosovar. “Dardanët” do të matin forcat me një nga kundërshtarët më cilësorë të grupit, ndërsa mbështetja nga shkallët e stadiumit “Fadil Vokrri” mbetet një nga armët kryesore të Përfaqësueses sonë. Foda ka vendosur besimin te një formacion i rifreskuar për këtë duel, ku Kosova synon të shfrytëzojë energjinë e publikut vendës për të siguruar një tjetër rezultat pozitiv në shtëpi.