Gucati kërkon shkarkimin e ministres Gërvalla: Të japë dorëheqjen dhe t’i kërkojë falje publike qytetarëve

Kryetari i Organizatës së Veteranëve të Luftës së UÇK-së, Hysni Gucati, ka përsëritur thirrjen e tij të prerë për largimin e Donika Gërvallës nga kabineti qeveritar, duke e kushtëzuar këtë me një ndjesë publike ndaj opinionit. Gjatë një paraqitjeje televizive në emisionin Frontal në T7, Gucati theksoi se shefja e diplomacisë kosovare duhet të lërë postin e saj ministror për shkak të qëndrimeve të mëparshme që ka mbajtur ndaj Gjykatës Speciale. Duke iu referuar deklaratave dhe dëshmive të vetë Gërvallës në të kaluarën, ai shtoi se ekzistojnë incizime dhe dokumente që vërtetojnë pretendimet e tyre. Gucati i bëri thirrje direkte kryeministrit Albin Kurti dhe vetë ministres që të ndërmarrin hapat e duhur. “Unë e di që Donika Gërvalla s’ish marrë me këto, e di që ajo ka deklaruar vetë që ka deponu dokumente, ne s’kemi thanë, ajo ka thënë, janë incizimet, janë filmimet. Ne kemi kërkuar nga kryeministri Albin Kurti, që Donika të japë dorëheqje. Unë du me besu që nëse don Albini ta ecë vendin përpara, edhe çështja e tyre që janë në burg atje, është mirë që Donika vetë të largohet, dhe të kërkojë falje para popullit dhe para opinionit”, u shpreh Gucati.