Harry Kane paralajmëron marrëveshjen e re me Bayern Munich: Jemi shumë afër

Krerët e Bayern Munichut dhe sulmuesi kryesor Harry Kane po shkojnë drejt një marrëveshjeje për vazhdimin e bashkëpunimit, ndërkohë që kontrata aktuale e kapitenit të kombëtares së Anglisë skadon më 30 qershor 2027. Atmosfera mes palëve mbetet tejet e qetë dhe konstruktive. Klubi gjerman kishte planifikuar fillimisht t'i jepte kohë sulmuesit që të mbyllte sezonin 2025/26, të paraqitej në Kupën e Botës dhe të shijonte pushimet verore, për t'iu përkushtuar më pas diskutimeve zyrtare. Megjithatë, interesimi i opinionit publik dhe i shtypit vendas ka qenë i vazhdueshëm, duke e vënë shpesh në qendër të vëmendjes çështjen e së ardhmes së tij në Mynih. I pyetur nga gazetarët mbi ecurinë e bisedimeve, sulmuesi nuk ka nguruar të pranojë se palët ndodhen në një pikë shumë të avancuar të negociatave. “Po flasim ende. Jemi në bisedime të mira, do të jem i sinqertë. Jemi mjaft afër. Ka ende disa gjëra që duhet të sqarojmë. Jam i lumtur me këtë. Mendoj se nuk do të kalojë shumë kohë para se të ketë ndonjë lloj njoftimi”, është shprehur Kane. Statistikat flasin qartë për ndikimin e jashtëzakonshëm të yllit anglez, i cili ka realizuar 152 gola në 154 ndeshje zyrtare me fanellën e bavarezëve, ndërkohë që aktualisht figuron mes pretendentëve kryesorë për të rrëmbyer trofeun prestigjioz të “Topit të Artë” për këtë vit.