Prapaskenat e bisedimeve SHBA-Rusi: Plani shumë-miliardësh për pasuritë e gjigantit 'Lukoil' në qendër të dialogut për Ukrainën

Përpjekjet e administratës së presidentit amerikan, Donald Trump, për të gjetur një zgjidhje për luftën në Ukrainë përmes bisedimeve direkte me Moskën, përfshijnë në tavolinë edhe një marrëveshje financiare me vlerë disa miliardë dollarë, e cila lidhet me asetet ndërkombëtare të kompanisë ruse të naftës, Lukoil. Sipas informacioneve të publikuara nga gazeta prestigjioze amerikane The New York Times, ky subjekt është ngritur personalisht nga presidenti rus, Vladimir Putin, gjatë takimit që ai zhvilloi në Kremlin me emisarët amerikanë Steve Witkoff dhe Jared Kushner, më datë 5 shtator. Kreu i Kremlinului e ka propozuar këtë transaksion si një mundësi konkrete për të ringjallur bashkëpunimin ekonomik dhe lidhjet tregtare ndërmjet Shteteve të Bashkuara dhe Federatës Ruse. Në garën për të marrë në pronësi pasuritë e huaja të Lukoil bën pjesë një konsorcium i gjerë. Ky grup përfshin donatorin e njohur të fushatës së Trumpit, Todd Boehly, investitorë nga Katari që kanë lidhje biznesi me Kushnerin, një fond investimesh nga Abu Dhabi i lidhur ngushtë me Sheikh Tahnoon, si dhe vetë qeverinë amerikane. Der më tani, autoritetet nuk kanë gjetur asnjë shenjë apo tregues se Jared Kushner ose Steve Witkoff mund të nxjerrin përfitime direkte apo personale nga kjo marrëveshje. Pavarësisht kësaj, rrjeta e gjerë e lidhjeve mes aktorëve të përfshirë ka ngritur pikëpyetje dhe shqetësime serioze në lidhje me një konflikt të mundshëm interesi. Bisedimet rreth fatit të aseteve të Lukoil mbeten një element kyç i diskutimeve më të gjera gjeopolitike dhe ekonomike mes Uashingtonit dhe Moskës, në një kohë kur administrata Trump po kërkon një rrugëdalje nga konflikti i armatosur në Ukrainë.