“E panjohura mund të zgjidhej moti”: Detaje nga takimi i papritur mes Lladrovcit dhe Konjufcës

Kryetari i Komunës së Drenasit, Ramiz Lladrovci, ka ndarë me ndjekësit e tij detaje nga një takim i rastësishëm që ka zhvilluar me ministrin e Punëve të Jashtme, Glauk Konjufcën, ku në qendër të bisedës on qenë sfidat dhe e ardhmja e vendit. Lladrovci ka sqaruar se në këtë bashkëbisedim nuk është diskutuar aspak për çështje politike apo për ndarje postesh, por fokusi ka qenë ekskluzivisht te idetë dhe mënyrat se si Kosova mund të zhvillohet për t'u bërë më e mirë për të gjithë qytetarët e saj.

Gjatë këtij prononcimi, kreu i Drenasit ka lënë të kuptohet se vendimet e duhura mund të ishin marrë shumë më herët, por sipas tij, nuk është tepër vonë për ata që shfaqen të vullnetshëm për t'i shërbyer vendit. Ai theksoi domosdoshmërinë e veprimit të shpejtë, duke shtuar se ngecja në vend nuk i sjell dobi Republikës.

Në mesazhin e tij përmbyllës, Lladrovci vuri theksin te nevoja e përshpejtimit të hapave zhvillimore, në mënyrë që perspektiva e rinisë të ndërtohet brenda kufijve të Kosovës, duke gjetur aty qetësinë dhe lumturinë e merituar.