Nga romanca te ndarja e papritur: Partnerja e Elon Musk konfirmon fundin e lidhjes pas pesë vitesh

Manjati i teknologjisë Elon Musk dhe Shivon Zilis, nëna e katër fëmijëve të tij, kanë marrë rrugë të ndara pas një lidhjeje që zgjati më shumë se pesë vjet. Lajmi u bë i ditur nga vetë Zilis përmes një postimi në platformën X, ku ajo sqaroi se vendimi për këtë kthesë erdhi menjëherë dhe pa asnjë lloj paralajmërimi të mëparshëm. "Është e vështirë të kalosh nga të qenit e dashuruar në të qenit e lënë brenda një jave, pa asnjë paralajmërim", ka shkruar ajo në mesazhin e saj publik. Për të ilustruar situatën, Zilis ndau gjithashtu pamjen e një bisede private me Musk, të datuar më 24 shtator. Në ato shkëmbime mesazhesh, të dy shprehnin ndjenja dashurie për njëri-tjetrin, ndërsa themeluesi i Tesla-s i kishte shkruar se do ta kishte ftuar në një darkë nëse do të ishte në dijeni se partnerët ishin të mirëpritur. Ata ndajnë së bashku katër fëmijë: binjakët Strider dhe Azure, të ardhur në jetë në vitin 2021, vajzën Arcadia e cila lindi në vitin 2024, si dhe djalin Seldon Lycurgus, i cili u lind në vitin 2025. Në fjalën e saj, Zilis shprehu mirënjohje të thellë për familjen që kanë ndërtuar së bashku, duke shfaqur dëshirën që të ruajnë raporte të shëndetshme si miq dhe bashkëprindër në të ardhmen. Ajo shtoi se e kishte dashur Musk-un "më shumë se jetën" dhe se, pavarësisht epokës së re të ndarjes, do të vazhdojë të kujdeset për të dhe t'i urojë vetëm lumturi. Deri në këto momente, Elon Musk ka zgjedhur të ruajë heshtjen, duke mos bërë asnjë koment publik lidhur me këtë zhvillim.