A e ndihmon Ramën braktisja e Parlamentit? Berisha u jep përgjigje aleatëve dhe cakton kursin e ri të opozitës

Kryetari i Partisë Demokratike, Sali Berisha, ka dhënë qëndrimin e tij prerë gjatë një takimi në selinë blu me aleatët politikë, lidhur me hapat që duhet të ndërmarrë opozita karshi institucioneve shtetërore. Gjatë kësaj tryeze, ai theksohet se një largim i mundshëm nga Kuvendi do t'i sillte vetëm përfitime kryeministrit Edi Rama, duke këmbëngulur se lufta politike duhet të vijojë brenda dyerve të institucioneve. Sipas Berishës, përballë këtij realiteti, protesta mbetet e vetmja rrugë e sigurt për të kërkuar largimin e kreut të ekzekutivit, teksa shtoi se shpresat se drejtësia e re, dhe konkretisht SPAK, mund ta rrëzojë atë, janë iluzore. "Kështu kemi të bëjmë me një njeri që e do me çdo kusht opozitën jashtë institucioneve. Kur të doni marrim vendimet dhe i diskutojmë, por dalja e opozitës jashtë institucioneve i shërben vetëm atij. Vetëm një gjë, ua them me përgjegjësi të plotë, dalja është interesi i tij absolut. Atë do," u shpreh ndër të tjera Berisha, duke shtuar se pritshmëritë ndaj organit të akuzës janë të pabazuara, pasi sipas tij ai kurrë nuk do t'i afrohet dot. Nga ana e tij, kreu i Grupit Parlamentar të Partisë së Lirisë, Tedi Blushi, ka dalë në mbështetje të idetë së Berishës për organizimin e protestave, duke propozuar një tubim kombëtar pikërisht në ditën kur në Kuvend pritet të kalojë për votim drafti i Partisë Socialiste për Reformën Territoriale. Duke folur para aleatëve, Blushi vuri në dukje se ky reagim popullor nuk duhet të jetë vetëm një çështje e banorëve të 15 bashkive që preken drejtpërdrejt nga ndryshimet, por një kauzë mbarëkombëtare, ndaj bëri thirrje që më 8 Tetor opozita të zbarkojë në shesh. "Opozita duhet t’u prijë protestave dhe seanca e thirrur të enjten është një mundësi që të gjithë shqiptarët, jo vetëm banorët e 15 bashkive, të mblidhen atë ditë para Kuvendit të Shqipërisë, për t’i treguar këtij kryeministri se zot në Republikën e Shqipërisë janë vetëm shqiptarët," deklaroi Blushi.