“Më the të të lajmëroja, por tani hesht”: Vajza e invalidit të luftës i adresohet publikisht deputetit Bajqinovci

Majlinda Shala, bijë e një invalidi të luftës, ka adresuar një reagim të hapur publik ndaj deputetit të Lëvizjes Vetëvendosje, Mefail Bajqinovci, të cilin e akuzon për indiferencë lidhur me një shqetësim të ngritur rreth procedurave të pranimit në Policinë e Kosovës. Shala tregon se deputeti në fjalë i kishte premtuar mbështetje duke i thënë se nëse do t'i shkaktohej ndonjë padrejtësi, duhet ta njoftonte atë. Megjithatë, sipas saj, edhe pse e ka vënë në dijeni për rastin, mungesa e reagimit ka qenë e plotë. Në rrëfimin e saj, ajo ka sjellë në vëmendje detaje nga procesi i testimit, duke pretenduar se ajo dhe rreth 25 kandidatë të tjerë janë mbajtur të mbyllur nga ora 09:00 deri në orën 10:00 duke biseduar për pandeminë e jo për provimin për të cilin ishin thirrur. Sipas saj, pas orës 10:00, me mbërritjen e ministrit, kandidatët kanë nisur të nxirren jashtë në grupe prej 15 personash. Ajo ka bërë të ditur se për këto parregullsi të pretenduara janë njoftuar edhe Policia e Rajonit të Gjilanit, Inspektorati Policor i Kosovës, si dhe Institucioni i Avokatit të Popullit, ndërkohë që ka shtruar pyetjen se përse nuk është kërkuar llogari zyrtarisht brenda Kuvendit për këtë çështje. Shala ka shprehur pakënaqësinë e saj ndaj diskursit politik mbi drejtësinë, duke theksuar se fjalët e politikanëve nuk po përputhen me veprimet në terren dhe se qytetarët nuk mund të ndihen të sigurt nëse zëri i tyre shpërfillet. Ajo ka qenë e prerë se nuk është duke kërkuar asnjë lloj favorizimi apo pozite pune, por kërkon vetëm që ngjarja të hetohet dhe t'i jepet një përgjigje institucionale. Në mbyllje të reagimit të saj të gjatë publik, Shala i është drejtuar sërish deputetit Bajqinovci, duke i kujtuar se besimi i qytetarëve fitohet vetëm përmes mbajtjes së fjalës dhe se tashmë ka mbetur që ai të japë shpjegimet e tij.