21 vjet nga ndarja nga jeta e Faruk Spahisë, Abdixhiku: Kontribut i çmuar për lirinë dhe shtetndërtimin

Kryetari i Lidhjes Demokratike të Kosovës, Lumir Abdixhiku, ka përkujtuar me nderim dhe mirënjohje të thellë veprimtarin dhe ish-kryetarin e Mitrovicës, Faruk Spahija, në 21-vjetorin e shkuarjes së tij në amshim. Në mesazhin e tij përkujtimor, kreu i LDK-së theksoi se sot, më 3 tetor,nderohet jeta dhe vepra e intelektualit dhe udhëheqësit të shquar, i cili la gjurmë të pashlyeshme në historinë e vendit. Abdixhiku u shpreh se Faruk Spahija i takon atij brezi që, në kohët më sfiduese të historisë sonë, u rreshtua në krah të lirisë, demokracisë dhe proceseve shtetndërtuese. Sipas tij, ai u dallua për urtësi, përkushtim dhe përgjegjësi të lartë qytetare. I ardhur nga një familje me tradita të spikatura atdhetare, Spahija ishte ndër figurat kyçe të themelimit të LDK-së në qytetin e Mitrovicës, si dhe bashkëpunëtor i ngushtë i Presidentit historik, Ibrahim Rugova. Besnikëria ndaj vizionit politik rugovian dhe interesit qytetar e shndërruan atë në një lider të respektuar. Besimi i fituar nga qytetarët e Mitrovicës, të cilët e votuan dy herë në krye të komunës, dëshmon më së miri integritetin dhe punën e tij të palodhur. Ndonëse ndarja e parakohshme nga jeta ia preu në mes mandatin e dytë, trashëgimia e tij vazhdon të jetë pjesë e rëndësishme e historisë politike e qytetare. Në këtë 21-vjetor, Faruk Spahija kujtohet si një njeri i urtë e i ndershëm, që shërbimin ndaj publikut e trajtoi si obligim moral ndaj vendit. Vepra e tij mbetet e skalitur në kujtesën e Lidhjes Demokratike të Kosovës dhe gjithë qytetarëve. Duke shprehur nderimin më të lartë për kontributin e tij jetësor, LDK përcjell mirënjohjen për gjithçka që Spahija bëri për Mitrovicën dhe mbarë Kosovën. Lavdi jetës dhe veprës së Faruk Spahisë!