Përdorimi i paautorizuar i imazhit, ylli i Manchester City, Erling Haaland, hedh në gjyq linjën ajrore norvegjeze

Sulmuesi i njohur i Manchester Cityt, Erling Haaland, ka ndërmarrë hapa ligjorë kundër kompanisë së fluturimeve “Norwegian Air Shuttle ASA”, pasi ajo ka shfrytëzuar imazhin e tij për qëllime reklamuese pa marrë lejen përkatëse. Sipas detajeve të konfliktit, në fokus të kësaj fushate marketingu ishte stilimi i veçantë i flokëve të futbollistit, i cili u kombinua përmes një fotomontazhi me një nga avionët e tyre. Kjo reklamë u shfaq gjatë periudhës së Kupës së Botës dhe shoqërohej nga mbishkrimi: “Nuk jemi ndjerë kurrë më norvegjezë”. Megjithëse postimi është fshirë tashmë nga platformat digjitale të kompanisë, sulmuesi ka këmbëngulur që çështja të kalojë në rrugë gjyqësore. Për vite me radhë, futbollisti është bërë i njohur për modelin e tij të flokëve me bisht, një element kyç i pamjes së tij si në fushën e lojës me fanellën e Manchester Cityt, ashtu edhe në paraqitjet me kombëtaren e Norvegjisë. Pavarësisht kësaj, ai vendosi ta ndryshonte këtë stil në nisje të edicionit aktual. Në krahun tjetër, drejtuesit e kompanisë “Norwegian Air Shuttle” kanë theksuar se nuk e kishin parashikuar që ky veprim do të prodhonte një betejë ligjore. “Është e vështirë për ne të kuptojmë pse përfunduam në gjykatë. Si pothuajse të gjithë të tjerët në Norvegji, ne bëmë tifo për ekipin kombëtar gjatë verës. E bëmë këtë përmes disa postimeve spontane, të frymëzuara nga trendet në mediat sociale”, deklaroi zëdhënësja Catharina Solli. Ajo shtoi se kompanisë i vjen keq që situata ka marrë këtë drejtim dhe shpreson që çështja të zgjidhet përmes dialogut. Ndryshe paraqitet situata sipas përfaqësuesit ligjor të futbollistit, Thomas Hagen, i cili insiston se baza e padisë është e qartë dhe e pakundërshtueshme. “Ky rast ka të bëjë me përdorimin ilegal të tipareve dalluese të Haaland nga norvegjezët për të shitur bileta aeroplani gjatë finaleve të Kupës së Botës”, tha Hagen. Gjatë këtij turneu, Haaland arriti të shënonte shtatë gola për fanellën e Norvegjisë, ndërsa kombëtarja e tij e mbylli aventurën duke u kualifikuar deri në fazën çerekfinale.