Ish-lojtari i United akuzon rëndë Ten Hag: Taktikisht i shkëlqyer, por katastrofë në raport me lojtarët

Ish-mesfushori i Manchester United, Fred, ka drejtuar akuza të forta ndaj ish-trajnerit të tij, Erik ten Hag, duke sjellë në vëmendje periudhën e kaluar nën urdhërat e teknikut holandez në “Old Trafford”. Gjatë një paraqitjeje në “Charla Podcast”, futbollisti brazilian ka thurur eloda për përgatitjen taktike të holandezit, por njëkohësisht nuk i ka kursyer kritikat për mungesën e aftësive në menaxhimin e grupit dhe komunikimin me lojtarët. “Ten Hag ishte jashtëzakonisht i zoti në aspektin taktik, por në raport me grupin ishte një dështim i plotë”, u shpreh Fred, i cili mbrojti ngjyrat e “Djajve të Kuq” për pesë sezone rresht, para se të largohej në drejtim të Fenerbahçes në merkaton e verës së vitit 2023. Sipas mesfushorit, holandezi është përfshirë shpesh në konflikte të hapura me disa nga emrat më të rëndësishëm të dhomave të zhveshjes. “Ai vishej në polemika me të gjithë. Pati përplasje me mua, me Cristiano Ronaldon, me Casemiron dhe me Marcus Rashfordin. Mua nuk më aktivizonte dhe atmosfera shpeshherë bëhej e papërballueshme”, zbuloi tutje braziliani. Gjithashtu, ai e ka etiketuar trajnerin si të anshëm, duke pretenduar se ai favorizonte hapur vetëm futbollistët e kombësisë së tij. “Me Ten Hag luanin vetëm lojtarët holandezë që solli ai vetë. Ishte një trajner që ndante grupin. Megjithatë, duhet pranuar se në rrafshin taktik mbetet ndër më të mirët me të cilët kam bashkëpunuar”, pranoi ai. Fred ndau edhe detaje rreth fërkimeve mes teknikut dhe Cristiano Ronaldos, të cilat përfunduan me ndarjen bujare mes yllit portugez dhe klubit anglez. Ai sqaroi se gjithçka nisi kur trajneri vendosi ta linte pesë herë fituesin e “Topit të Artë” jashtë formacionit bazë, duke ndezur një situatë tensioni. Mesfushori ka evokuar edhe momentin kur skuadra mori vesh për intervistën e bujshme të Ronaldos dhënë gazetarit Piers Morgan. “Menjëherë pas ndeshjes, sapo avioni preku tokën dhe stafi aktivizoi internetin në celularë, panë intervistën ku ai kritikonte ashpër klubin. Në atë moment shpërtheu paniku. Ishte një kaos i vërtetë dhe një javë e mbushur me konfuzion total”, tregoi Fred. Në fund të rrëfimit të tij, lojtari bëri një krahasim, duke veçuar në dritë pozitive Ole Gunnar Solskjaer dhe José Mourinho për mënyrën se si silleshin me grupin. Për Mourinhon, i cili e kishte sjellë në “Old Trafford” në vitin 2018, ai theksoi: “Mourinho është një figurë madhështore dhe shumë i gëzuar. Është vërtet një personazh i jashtëzakonshëm”.