Përplasja e fortë në distancë: Protestuesi shigjeton kryeministrin Edi Rama për përgjegjësinë e emërimeve dhe skandalet qeveritare

Një qytetar ka adresuar pyetje dhe kritika të forta ndaj kryeministrit Edi Rama, duke ironizuar qëndrimet e këtij të fundit rreth konceptit të përgjegjësisë individuale, sidomos pas zhvillimeve të fundit lidhur me ish-drejtuesen e Shërbimit Informativ Shtetëror, Vlora Hyseni. Sipas të riut, skandalet që kanë njollosur kabinetin qeveritar ndjekin një skenar të njohur: kreu i qeverisë fillimisht merr në mbrojtje zyrtarët e përfshirë, ndërsa më pas, kur ata përballen me organet e drejtësisë, i braktis duke u munduar që fajësinë ta paraqesë si çështje të pastër personale të individit. Në fjalën e tij, protestuesi solli në vëmendje edhe operacionin e ndërmarrë nga Prokuroria e Posaçme (SPAK), e cila me vendim të Gjykatës së Posaçme (GJKKO) zhvilloi kontrolle intensive në banesën dhe zyrat e Ron Yeffet, si dhe ndaj personave të tjerë që kanë lidhje me kompaninë shtetërore KAYO. Duke iu drejtuar drejtpërdrejt kreut të qeverisë, ai shtroi pyetjen thelbësore se kush duhet të mbajë peshën e fajësisë për figurat që janë emëruar, avancuar në karrierë apo janë marrë në mbrojtje politike ndër vite. “Rama ka folur për sukses, ndërsa më gjerësisht ka folur SPAK me raporte. Për çdo ministër apo zyrtar që është përballur me drejtësinë, fillimisht i ka mbrojtur, më pas ka bërë si i habitur sikur e kanë prerë në besë misionin e tij të pastër. Kur shpërtheu skandali i inceneratorëve, Rama tha se ishte krenar për këtë vepër dhe kur u pyet për korrupsionin e quajti devijim individual. Pra projekti ishte i qeverisë kur duhej të mbrohej, por kur erdhi dita e llogarisë, përgjegjësia ishte e individit. Debati u zhvendos nga përgjegjësia politike te pyetja nëse ka akuza ndaj Ramës. Sipas Ramës, përgjegjësia fillon vetëm kur ka aktakuzë. Sot SPAK bëri kontrolle në vilën e Ron Yeffet dhe sekuestroi telefonin e Ardi Veliut. Sot Rama e paraqet si sukses KAYO-n, por kur nesër të plasë skandali do të thotë se e respekton drejtësinë dhe përgjegjësia është individuale. Kur u kthye nga Amerika, Rama tha se përgjegjësia e tij politike është një: reforma në drejtësi. Po për njerëzit që ke emëruar, promovuar, mbrojtur politikisht, vendimet që ke mbështetur, projektet që ke reklamuar, skandalet që kanë shpërthyer njëri pas tjetrit kush do të përgjigjet? Kur fillon përgjegjësia e një kryeministri?”, deklaroi ndër të tjera i riu.