Thirrje nga Uashingtoni për Prishtinën: Konsensusi politik dhe uniteti, parakusht për stabilitetin e vendit

Kryeministri i Republikës së Kosovës, Albin Kurti, ka pranuar një letër zyrtare nga kongresisti amerikan Michael Lawler, i cili shërben si anëtar i Komisionit për Punë të Jashtme të Dhomës së Përfaqësuesve të SHBA-së dhe si kryetar i Nënkomisionit për Lindjen e Mesme dhe Afrikën e Veriut. Në mesazhin e tij drejtuar kreut të ekzekutivit, ligjvënësi amerikan ka përcjellë urimet për marrjen e mandatit të katërt qeverisës, ndërkohë që ka vënë theksin te domosdoshmëria e angazhimit konstruktiv të të gjitha subjekteve politike në bisedime me mirëbesim, me qëllim arritjen e një konsensusi për zgjedhjen e presidentit të ri të vendit. Sipas vlerësimit të kongresistit Lawler, i njohur si një ndër zërat mbështetës të Kosovës në Kongresin amerikan, sigurimi i një marrëveshjeje politike është thelbësor për të parandaluar një caktim të mundshëm të zgjedhjeve të reja parlamentare dhe për të garantuar mbrojtjen e stabilitetit institucional. Duke konfirmuar përkushtimin e plotë ndaj aspiratave euroatlantike të shtetit, Lawler ka theksuar se anëtarësimi i Kosovës në NATO mbetet një hap vendimtar, jo vetëm për sigurinë afatgjatë të vendit, por edhe për ruajtjen e paqes dhe qetësisë në të gjithë rajonin e Ballkanit Perëndimor. “Pjesërisht si rezultat i punës suaj drejt anëtarësimit në NATO, unë shoh se Kosova është në rrugën e duhur për t’u bërë një demokraci e fortë, me rritje solide ekonomike dhe prosperitet të përbashkët. Stabiliteti qeveritar është çelësi. Andaj, shpresoj që vendi juaj të jetë i suksesshëm në zgjedhjen e presidentit të ri në javët në vijim, për të parandaluar një raund të ri zgjedhjesh parlamentare - për herë të katërt në më pak se dy vjet”, ka shkruar ai në letrën e tij. Më tej, zyrtari i lartë amerikan ka tërhequr vëmendjen te rëndësia e bashkëpunimit ndërpartiak dhe e harmonizimit të veprimeve, sidomos në këtë periudhë që pason vendimin e Gjykatës Speciale në Hagë të shpallur më 16 shtator. “Posaçërisht në dritë të aktgjykimit të javës së kaluar në Hagë, nuk ka moment më të rëndësishëm për unitetin kombëtar të Kosovës se sa tani. Ju bëj thirrje që të punoni për t’u siguruar që të gjithë akterët politikë të kthehen në negociata me mirëbesim dhe të gjejnë konsensusin e nevojshëm për të zgjedhur presidentin”, ka shtuar tutje kongresisti Lawler. Në fund të letrës, ai ka ritheksuar se ruajtja e stabilitetit institucional është parësore për t’i mundësuar institucioneve të fokusohen te sfidat kyçe, përfshirë edhe forcimin e mëtejshëm të partneritetit strategjik me Shtetet e Bashkuara të Amerikës.