Prokuroria rrëzon kallëzimin e Komunës së Prishtinës: S’pati bllokim të buxhetit nga Ministria

Ministria e Financave ka njoftuar se Prokuroria ka marrë vendim për hedhjen poshtë të kallëzimit penal të dorëzuar nga drejtuesit e Komunës së Prishtinës, të cilët akuzonin dikasterin qeveritar për bllokim të qëllimshëm të mjeteve buxhetore. Sipas komunikatës zyrtare, ky epilog konfirmon se pretendimet e zyrtarëve komunalë kanë qenë plotësisht të pavërteta dhe se administrata e Ministrisë së Financave ka vepruar çdo herë në përputhje të plotë me legjislacionin në fuqi. “Ministria e Financave ka pranuar njoftimin nga prokuroria se është hedhur poshtë kallëzimi penal i bërë nga zyrtarë të Komunës së Prishtinës me pretendimin e pabazë se Ministria e Financave kishte bllokuar buxhetin e komunës”, thuhet ndër të tjera në njoftim. Nga kjo ministri është rikujtuar se vonesa për buxhetin e vitit 2025 është shkaktuar nga vetë Komuna e Prishtinës, pasi dokumentacioni ishte dorëzuar me muaj të tërë vonesë krahasuar me afatet ligjore, dhe kjo pasi Kuvendi kishte miratuar tashmë Ligjin e Buxhetit. “Kjo vonesë e Komunës kishte rezultuar në mos-përfshirje të buxhetit komunal në Ligjin e Buxhetit, gjë që kishte pamundësuar alokimin dhe shfrytëzimin e plotë të buxhetit komunal në këtë rast”, ka deklaruar Ministria e Financave. Në reagim thuhet gjithashtu se udhëheqësia e kryeqytetit kishte zgjedhur që pakënaqësitë t'i drejtojë përmes akuzave publike ndaj stafit shtetëror për gjoja bllokim të orkestruar, duke formalizuar madje edhe padi penale. “Ministria e Financave mirëpret epilogun e kësaj çështjeje që vërteton se akuzat ndaj stafit të Ministrisë ishin të pabaza, dhe njëkohësisht rikonfirmon përkushtimin që të vazhdojë punën profesionale”, përmbyllet njoftimi. Lidhur me këtë vendim, ka reaguar përmes një postimi në rrjetet sociale edhe ministri në detyrë, Hekuran Murati, i cili ka theksuar se e vërteta doli në dritë. “Prokuroria ka hedhur poshtë kallëzimin penal të Komunës së Prishtinës për gjoja bllokim të buxhetit në vitin e kaluar”, ka shkruar Murati. “Vërtetohet se nuk kishte kurrfarë bllokimi të buxhetit nga Ministria e Financave”, ka shtuar ai në reagimin e tij.