Kriza thellohet te Vllaznia, klubi shkodran zyrtarizon ndarjen nga trajneri Edi Martini

Klubi i futbollit Vllaznia ka marrë vendimin zyrtar për të ndërprerë bashkëpunimin me trajnerin Edi Martini, pas një starti tejet zhgënjyes në edicionin e ri futbollistik, ku kuqeblutë kanë grumbulluar vetëm dy pikë në pesë sfidat e para të kampionatit. Përmes një deklarate për media, drejtuesit e klubit shkodran kanë konfirmuar mbylljen e aventurës së Martinit në krye të skuadrës, duke e falënderuar publikisht për angazhimin dhe punën e bërë gjatë kësaj periudhe, teksa i kanë uruar gjithashtu suksese në hapat e ardhshëm të karrierës së tij profesionale. Ndërkohë, drejtuesit e Vllaznisë nuk kanë zbuluar ende emrin e pasuesit që do të marrë drejtimin e stolit, ndërsa brenda javës së ardhshme pritet të zyrtarizohet trajneri i ri i skuadrës.