Faturë e kripur dhe sanksione të rënda, Komisioni i Disiplinës godet klubet e futbollit

Komisioni i Disiplinës dhe Etikës pranë Federatës Shqiptare të Futbollit ka bërë publike vendimet dhe masat ndëshkimore për ngjarjet e regjistruara gjatë javës së 5-të të Abissnet Superiores, ku goditjen më të rëndë e ka pësuar klubi i Vorës pas sfidës kundër Skënderbeut. Sanksionet e vendosura përfshijnë gjoba financiare të konsiderueshme dhe zhvillimin e takimeve pa praninë e spektatorëve. Ndërkohë, paralajmërim zyrtar ka marrë edhe trajnerë të ndryshëm për shkak të mosrespektimit të detyrimeve mediatike pas përfundimit të ndeshjeve. Konkretisht, KF Vora u ndëshkua për dështim në garantimin e rendit dhe sigurisë, si dhe për sjellje të gabuar të tifozëve të cilët hodhën sende në fushë duke rrezikuar zyrtarët. Për këto shkelje, klubi u dënohet me gjobë prej 200.000 (dyqind mijë) lekësh dhe detyrohet të zhvillojë 2 (dy) ndeshje pa praninë e spektatorëve në stadiumin e vet. Në të njëjtën linjë, zyrtari i KF Vorës, Arian Bella, u paralajmërua se në rast përsëritjeje të shmangies së intervistave pas ndeshjes do të përballet me masa më të rënda disiplinore, në përputhje me rregulloren e aktivitetit. Një masë edhe më e rëndë ka rënë mbi zyrtarin tjetër të KF Vorës, Bazion Tragaj, i cili për shkak të sjelljes së dhunshme ndaj zyrtarëve të ndeshjes dhe mosrespektimit të vendimit nr. 06, datë 17.09.2026, është dënuar me gjobë prej 50.000 (pesëdhjetë mijë) lekësh dhe 10 (dhjetë) ndeshje pezullim nga çdo aktivitet zyrtar i organizuar nga FSHF. Kësaj mase i shtohet edhe periudha e pashlyer e dënimit të mëparshëm, ndërsa klubi mban përgjegjësi solidare për shlyerjen e detyrimeve financiare të zyrtarëve të tij. Vendime ndëshkimore janë marrë edhe për skuadrat e tjera. KF Kukësi është gjobitur me 100.000 (njëqind mijë) lekë për probleme me sigurinë dhe ndezjen e flakadanëve nga tifozët, ku gjoba zbatohet në masën 50% sipas rregullores. Ndërsa zyrtari i këtij klubi, Fundim Dollaku, u dënuar me 4 (katër) ndeshje pezullim për sjellje josportive ndaj zyrtarëve. Në kategoritë e tjera, lojtari i KS Kastrioti, Oresti Kasmollari, është pezulluar me 2 (dy) ndeshje për provokim të spektatorëve. Ndërkohë, klube si KF Oriku, KF Besëlidhja dhe FC Besa janë gjobitur secila me nga 50.000 (pesëdhjetë mijë) lekë, me aplikim të gjobës në masën 50%, për shkak të hedhjes së sendeve në fushë nga tifozët e tyre. Në futbollin e femrave, KF Lushnja Vajza është ndëshkuar për shkak të braktisjes së sfidës së vlefshme për kampionatin e vajzave kundër KF Egnatia Vajza.