Alarm për bombë në Prishtinë: Policia sqaron situatën në rrugën “Rrustem Hyseni”

Policia e Kosovës ka dalë me një njoftim zyrtar lidhur me shqetësimin e krijuar sot në rrugën “Rrustem Hyseni” në kryeqytet, ku ishte raportuar për praninë e një mjeti të dyshuar shpërthyes. Zëdhënësi i Policisë, Enis Plana, ka konfirmuar se pas verifikimeve të detajuara nga njësitet e specializuara të deminimit, është vërtetuar se nuk bëhej fjalë për ndonjë mjet shpërthyes. Situata është vlerësuar si e sigurt pas përfundimit të kontrolleve në terren. “Rasti është trajtuar me seriozitetin e duhur nga ana e forcave të rendit. Pas ekzaminimeve të kryera nga njësitë kompetente, është konfirmuar se nuk ka pasur mjet shpërthyes. Aktualisht, hetuesit policorë në bashkëpunim të ngushtë me prokurorin e shtetit janë duke punuar për të sqaruar të gjitha rrethanat dhe motivet që kanë çuar deri te ky rast”, deklaroi Plana. Kujtojmë se menjëherë pas marrjes së informatës, autoritetet kishin ndërmarrë masat e nevojshme të sigurisë, duke rrethuar zonën dhe duke evakuuar qytetarët nga perimetri i caktuar për të shmangur çdo rrezik të mundshëm.