Karateisti Nedim Shaqiri synon majat në turneun prestigjioz në Salzburg

Një tjetër sprovë ndërkombëtare e rëndësishme e pret Nedim Shaqirin, anëtarin e Klubit të Karatesë “Rinia” nga Mateçi. Sportisti do të udhëtojë drejt qytetit austriak, Salzburg, ku prej 2 deri më 4 tetor do të marrë pjesë në turnetin e njohur “Karate One Series A”. Kjo ngjarje është ndër më prestigjiozet e kalendarit global të këtij sporti dhe zhvillohet nënnënshkrimin e Federatës Botërore të Karatesë (WKF). Shaqiri do të masë forcat në divizionin e seniorëve, në kategorinë e peshave deri në 60 kilogramë, përballë një konkurrence tejet të fortë që përfshin garues elitarë nga mbarë globi. Kjo paraqitje vjen në një periudhë tejet të favorshme për karrierën e tij, pasi gjatë këtij viti ai shkëlqeu në Kampionatin Evropian për Seniorë në Frankfurt, duke u renditur në vendin e pestë. Falë këtij suksesi, pritshmëritë për paraqitjen e tij në Austri janë rritur ndjeshëm. Drejtuesit e Klubit të Karatesë “Rinia” bëjnë me dije se sportisti është përgatitur maksimalisht dhe se bagazhi i tij nga eventet evropiane dhe botërore përbën një epërsi vendimtare. “Presim rezultat pozitiv nga Nedimi. Ai është i përgatitur dhe ka përvojë të madhe në gara evropiane dhe botërore. Shpresojmë që të ketë një paraqitje të denjë dhe rezultat pozitiv”, ka deklaruar trajneri i klubit, Seful Osmani. Paraqitja në “Karate One Series A” përbën një tjetër stacion kyç për Shaqirin, i cili synon të konfirmohet mes më të mirëve në skenën ndërkombëtare. Përmes këtij angazhimi, Klubi i Karatesë “Rinia” dëshmon edhe një herë praninë e tij në nivelet e larta, duke përfaqësuar me përkushtim dhe dinjitet sportin e Mateçit dhe të Komunës së Likovës.