“Ose do t’ju sjell këtu, ose vij unë” – Mesazhi i fortë i Nasim Haradinajt për ish-krerët e UÇK-së në Hagë

Gjatë një fjalimi të mbajtur para qytetarëve të mbledhur në shesh për të kërkuar drejtësi, ish-nënkryetari i Organizatës së Veteranëve të Luftës së UÇK-së, Nasim Haradinaj, ka dhënë një mesazh të qartë dhe të drejtpërdrejtë drejtuar faktorit ndërkombëtar, duke theksuar se nuk do të lejohet fyerja e gjakut të dëshmorëve dhe viktimave të luftës në Kosovë. Duke folur para masës, ai u shpreh se institucionet ndërkombëtare nuk mund ta mashtrojnë popullin dhe bëri të qartë se nuk do të pranohet në asnjë mënyrë minimi apo fyerja e mbi 400 masakrave të ndodhura gjatë konfliktit, duke bërë thirrje për unitet nën emrin e Ushtrisë Çlirimtare të Kosovës. Në përmbyllje të fjalës së tij, Haradinaj ka dërguar një porosi emocionale dhe provokuese edhe për ish-krerët e UÇK-së që po mbahen paraburgim në Hagë, duke mbyllur fjalimin e tij me frazën se ose do t'i kthejë ata në vendlindje, ose do të udhëtojë vetë drejt tyre.