Gashi para studentëve evropianë: Integrimi i vendit duhet të përkthehet në dobi reale për qytetarët

Kryetari i Kuvendit, Afrim Gashi, ka mirëpritur dhe mbajtur një fjalim para një delegacioni prej 36 studentësh ndërkombëtarë të studimeve pasuniversitare nga Departamenti i Transformimit dhe Integrimit Evropian në Kolegjin e Evropës – Kampusi i Tiranës. Këta të rinj, që vijnë nga 19 shtete të ndryshme evropiane, po qëndrojnë për vizitë studimore në Republikën e Maqedonisë së Veriut. Gjatë fjalës së tij, Gashi e cilësoi anëtarësimin në Bashkimin Evropian si një synim afatgjatë dhe strategjik të vendit, duke nënvizuar se ky rrugëtim duhet domosdoshmerisht të prodhojë përmirësime konkrete dhe të prekshme për jetën e qytetarëve. Kreu i Kuvendit u ndal gjithashtu te sfidat dhe kompleksiteti i negociatave të aderimit. Ai kujtoi se kanë kaluar 23 vite që nga Samiti i Selanikut i vitit 2003, i cili rikonfirmoi të ardhmen evropiane të rajonit me kushtin e plotësimit të kritereve. Duke marrë parasysh ndryshimin e rrethanave gjeopolitike, ai e konsideroi zgjerimin e bllokut evropian si një element kyç për sigurinë dhe stabilitetin. Gashi foli edhe për peshën e kompromiseve, duke sjellë në vëmendje ndryshimin e emrit të shtetit për t'i hapur rrugë integrimit euroatlantik, pavarësisht se hapja formale e kapitujve negociues ende mungon. Në këtë kontekst, ai vuri theksin te përmbushja e detyrave të shtëpisë nga vendet kandidate, duke përmendur përparimin në agjendën e reformave, veçanërisht në fusha kyçe si sundimi i ligjit, zhvillimi i kapitalit njerëzor, tranzicioni i gjelbër dhe ai digjital, si dhe ekonomia, të cilat përbëjnë bazën për ngritjen e standardit të jetesës dhe përafrimin me normat evropiane. Sa i përket punës së institucionit ligjvënës, bëhet e ditur nga kabineti i tij se Gashi rikonfirmoi përkushtimin e tij për një Kuvend plotësisht të hapur dhe për aplikimin e standardeve më të larta administrative e demokratike, me qëllim përmbushjen sa më efektive të kërkesave dhe nevojave të qytetarëve.