Konjufca nga Mali i Zi: Procesi i Berlinit kërkon rezultate reale, integrimi evropian të bëhet me merita

Kryediplomati i Kosovës, Glauk Konjufca, ka marrë pjesë në punimet e takimit të ministrave të punëve të jashtme të Procesit të Berlinit, ngjarje kjo e organizuar në Przhno të Malit të Zi. Gjatë fjalës së tij në këtë ngjarje të rëndësishme rajonale, Konjufca vuri theksin te pozita sfiduese e shqiptarëve që jetojnë në Luginën e Preshevës, duke kërkuar vëmendje ndërkombëtare për shqetësimet e tyre. "Pasivizimi i adresave, pengesat në njohjen e diplomave dhe përfaqësimi i pamjaftueshëm në institucionet shtetërore janë probleme konkrete që kërkojnë zgjidhje konkrete. Të drejtat e komuniteteve duhet të garantohen dhe të respektohen njësoj për të gjithë", u shpreh ai. Ministri po ashtu trajtoi domosdoshmërinë e një bashkëpunimi të ngushtë rajonal të bazuar te parimi i barazisë, duke kërkuar që dokumentet dhe marrëveshjet e dakorduara të mos mbeten vetëm në letër, por të sjellin dobi të drejtpërdrejta për qytetarët. "Për Kosovën, integrimi evropian duhet të ecë përpara mbi bazën e meritave dhe rezultateve. Progresi i arritur duhet të pasohet nga hapa konkretë në procesin e integrimit, që për Kosovën nënkupton marrjen e statusit të vendit kandidat dhe hapjen e negociatave për anëtarësim. Procesi i Berlinit e dëshmon vlerën e tij atëherë kur bashkëpunimi rajonal shndërrohet në rezultate konkrete dhe të prekshme në jetën e qytetarëve", përfundoi deklaratën e tij Konjufca.