Rrëfimi prekës i Ramush Haradinaj: Çfarë i tha nëna e Jusuf Gërvallës për luftën e UÇK-së

Ish-kryeministri i Kosovës, Ramush Haradinaj, ka ndarë me publikun kujtime nga një takim i veçantë me Ajshe Gërvallën, nënën e heroit dhe veprimtarit të shquar, Jusuf Gërvalla. Gjatë një rrëfimi televiziv, Haradinaj ka bërë të ditur se ky takim ishte zhvilluar në periudhën kur ishte formuar brigada e drejtuar nga vëllai i tij, Daut Haradinaj. Ai ka veçuar një moment mjaft emocional, kur nëna Ajshe i kishte shprehur hapur mirënjohjen e saj të thellë për qëndresën dhe angazhimin luftarak. Duke cituar fjalët e saj prekëse, ish-kryeministri tregoi: “Ma jep dorën ta puthi gishtin që po merr hak për Jusufin”. Në fjalën e tij, Haradinaj shtoi se lidhjet mes dy familjeve datojnë që nga e kaluara, duke theksuar se bashkëpunimi dhe kontaktet e hershme kanë krijuar një themel respekti të ndërsjellë ndër vite, ndërsa nuk la pa përmendur se pozicioni i tij karshi Donika Gërvallës, bijës së Jusuf Gërvallës, mbetet ai i njohur tashmë për opinionin publik.