Operacioni “Last meeting” në Tiranë: Goditet rrjeti i prostitucionit, pranga pesë shtetaseve të huaja dhe shpallet në kërkim 35-vjeçari

Policia e Shtetit ka finalizuar me sukses operacionin e koduar “Last meeting”, pas një sërë hetimesh dhe monitorimi intensiv të hapësirës digjitale, duke goditur një rrjet të ushtrimit të prostitucionit në kryeqytet. Si rezultat i këtij aksioni, janë vënë në pranga pesë shtetase të huaja, ndërsa është shpallur në kërkim një person tjetër, si dhe janë nisur hetimet për dy të tjerë. Në pranga kanë rënë tre shtetase nga Vietnami: V. P., 40 vjeçe, P. K., 42 vjeçe dhe P. M., 33 vjeçe, si dhe dy shtetase nga Kina: L. Y., 42 vjeçe dhe X. H., 42 vjeçe. Sipas autoriteteve, këto gra zhvillonin aktivitetin e paligjshëm në tre apartamente të ndryshme të marra me qira ditore, të cilat ndodheshin në rrugët “Qemal Stafa”, “Him Kolli” dhe “Tomor Malasi”. Gjatë hetimeve, është identifikuar dhe shpallur në kërkim shtetasi vietnamez T. T., 35 vjeç, i cili dyshohet se kundrejt përfitimeve financiare siguronte kushtet e nevojshme për ushtrimin e kësaj veprimtarie nga tre bashkëkombëset e tij të arrestuara. Përveç tij, janë vënë nën hetim edhe dy shtetas të tjerë, të cilët dyshohet se përfitonin nga ky rrjet. Gjatë ndërhyrjes në banesa, shërbimet e Policisë sekuestruan pesë aparate celulare, të cilat përdoreshin nga të dyshuarat për të bërë reklamime dhe postime rreth kësaj veprimtarie në platformat e ndryshme të rrjeteve sociale. Materialet e plota procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme ligjore, ndërkohë që vijojnë përpjekjet intensive për kapjen e shtetasit të shpallur në kërkim.