Kurti kërkon drejtësi të paanshme nga Haga: Shpresojmë në ndreqjen e gabimeve në Apel

Gjatë një konference të përbashkët për media me presidenten e Komisionit Evropian, Ursula von der Leyen, kryeministri i Kosovës, Albin Kurti, ka komentuar vendimin e fundit të Gjykatës Speciale në Hagë, duke veçuar tri pika kryesore që, sipas tij, meritojnë vëmendje në rrafshin ndërkombëtar. Kreu i ekzekutivit sqaroi se pretendimet rreth të quajturës “Shtëpi e Verdhë” dhe trafikimit të organeve nuk figurojnë fare në aktakuzë, se akuzat për krime kundër njerëzimit dhe sulme të sistematizuara ndaj popullatës civile janë rrëzuar, si dhe se vetë Gjykata Speciale ka bërë të qartë se Ushtria Çlirimtare e Kosovës nuk është subjekt i gjykimit. Megjithatë, shefi i qeverisë ka shprehur rezerva lidhur me pjesët e tjera të këtij aktgjykimi dhe dënimet e dhëna, duke u shprehur i bindur se ato përmbajnë lëshime me natyrë faktike, historike dhe juridike, të cilat domosdoshmërisht duhet të ndreqen gjatë shqyrtimit në shkallë të dytë. “Drejtësia duhet të jetë e paanshme dhe duhet të shihet e përjetohet si e paanshme”, u shpreh Kurti para gazetarëve. Në këtë linjë, ai ritheksoi se Kosova angazhohet për një drejtësi të plotë për të gjitha viktimat e konfliktit, për secilin krim dhe autor, duke sjellë në vëmendje edhe vuajtjet e viktimave të dhunës seksuale gjatë periudhës së luftës.