Dardan Krasniqi: Albin Kurti e ka helmuar terrenin politik dhe nuk mund t'i shtrijë dorën Hashim Thaçit

Ish-kandidati për deputet në Kuvendin e Kosovës, Dardan Krasniqi, ka adresa kritika të ashpra ndaj kryeministrit Albin Kurti, duke u fokusuar te qasja e kreut të ekzekutivit ndaj ish-udhëheqësve të Ushtrisë Çlirimtare të Kosovës (UÇK), të cilët aktualisht po përballen me procese gjyqësore në Dhomat e Specializuara në Hagë. Sipas Krasniqit, qëndrimet e kaluara të kryeministrit dëshmojnë një distancim të plotë nga figurat kyçe të luftës, duke theksuar se dikush që dikur ka përdorur thirrje për largimin e tyre, nuk mund të ndryshojë papritur qasje. “Ajo çka ka qenë vërtet e rëndësishme është se terreni është shumë i helmuar, i kontaminuar. Unë nuk do të doja ta ktheja në debat shumë çështje, por nuk pres që një personalitet politik që i ka thënë ‘shko Hashim’, t’i thotë ‘eja Hashim’. Unë nuk pres asgjë nga zoti Kurti, i cili e ka braktisur jetën e qytetarëve në këtë vend; e ka braktisur të varfrin, të riun, të sëmurin dhe secilin institucion në këtë vend”, u shpreh Krasniqi.