Gjykimi për krime lufte në Istog: Seanca mbyllet për publikun, dëshmon dëshmitari mbrojtur

Gjykata Themelore në Prishtinë ka marrë vendim që seanca e së enjtes në procesin gjyqësor ndaj Momir Pantiq dhe Zharko Zariq, të cilët akuzohen për krime lufte kundër popullatës civile në rajonin e Istogut, të zhvillohet pas dyerve të mbyllura për shkak të dëshmisë së një dëshmitari anonim. Kryetarja e trupit gjykues, Donikë Shala-Abdyli, ka bërë të ditur se gjatë kësaj seance do të paraqesë dëshminë e saj dëshmitarja apo dëshmitari anonim me kodin B1, për të cilin më parë ishin caktuar masa e mbrojtjes dhe urdhri për anonimitet. Prokurorja speciale Florije Salihu-Shamolli kishte kërkuar mbylljen e seancës duke u bazuar në natyrën e ndjeshme të çështjes, ndërsa avokatët mbrojtës të të pandehurve, Millosh Deleviq dhe Dejan Vasiq, e lanë vendimin në dorë të trupit gjykues pa ngritur kundërshtime. Sipas aktakuzës së ngritur më 1 shtator 2024 nga Prokuroria Speciale e Republikës së Kosovës (PSRK), ish-shefi i stacionit policor në Istog, Momir Pantiq, dhe ish-polici Zharko Zariq, ngarkohen me përgjegjësi penale në bashkëkryerje për veprën “Krime lufte kundër popullsisë civile”. Dokumenti i akuzës sqaron se më 19 maj 1999, në kompleksin e Burgut të Dubravës në Istog, pas sulmeve ajrore të NATO-s ku kishin humbur jetën tre të burgosur shqiptarë, Pantiq në cilësinë e shefit të stacionit policor, së bashku me formacionet policore serbe, kishin hyrë për të marrë kontrollin e hapësirës. Ata, në bashkëveprim me gardianët, kishin depërtuar në ambientet ku mbaheshin të burgosurit dhe kishin ushtruar dhunë sistematike dhe trajtim mizor ndaj tyre, vetëm pse i përkisnin kombësisë shqiptare. Më tej, aktakuzat dëshmojnë se bombardimet e NATO-s kishin vazhduar edhe më 21 maj, duke lënë të vrarë 18 të burgosur dhe dhjetëra të plagosur. Një ditë më pas, në orët e mëngjesit, gardianë, civilë të armatosur serbë, forca policore dhe Njësitë Speciale që vepronin nën komandën e Stacionit Policor të Istogut, i kishin tubuar të burgosurit shqiptarë në fushën e sportit. Aty ata kishin hapur zjarr me armë të ndryshme, ndërkohë që nga pas mureve të burgut janë hedhur edhe mjete shpërthyese në drejtim të tyre. Për më tepër, sipas pretendimeve të Prokurorisë Speciale, strukturat policore nën drejtimin e Pantiqit kishin rrëmbyer një civil shqiptar me pseudonimin “A1”, i cili më pas ishte dhunuar seksualisht. Në të njëjtën aktakuzë përfshihet edhe përshkrimi i dhunimit të një viktime tjetër me shifrën “B1”, ndërsa të dy të pandehurit akuzohen gjithashtu për vrasjen e disa familjeve civile në territorin e Komunës së Istogut.