Vrasja në dasmë: Gjykata dënon me 16 vjet burg ish-efektivin e policisë Festim Ramadani

Gjykata Themelore në Ferizaj, përkatësisht Departamenti për Krime të Rënda me kryetar trupi gjykues gjyqtarin Ilir Bytyqi, ka dhënë sot vendimin fajtor për ish-policin Festim Ramadani, i cili akuzohej për veprën penale të vrasjes së rëndë. Pas përfundimit të procedurave gjyqësore, Ramadani është dënuar me 16 vjet heqje lirie për këtë ngjarje të rëndë. Bazuar në dosjen e prokurorisë, krimi ka ndodhur më 16 gusht të vitit 2024, rreth orës 19:21, në hapësirën e parkingut të restorantit “F. Palace” në fshatin Bibaj të Ferizajt, në kohën kur atje po zhvillohej një dasmë. Sipas aktakuzës, ish-polici kishte vepruar me dashje dhe paramendim, duke u nisur nga motive të pretenduara familjare. Ai kishte hapur zjarr me breshëri plumbash në drejtim të viktimës S.S., i cili kishte ndërruar jetë në vendngjarje si pasojë e plagëve të marra. Hetimet dhe aktakuza kishin zbardhur se ngjarja tragjike ishte zhvilluar para syve të dhjetëra dëshmitarëve, mes të cilëve kishte edhe fëmijë të mitur, ndërsa theksohej se për kryerjen e krimit autori kishte përdorur armën e tij zyrtare automatike të shërbimit.