Klubi historik francez kalon në duar të reja për çmimin simbolik prej 1 euroje

Një nga emrat më të shquar të futbollit francez, Bordeaux, ka zyrtarizuar kalimin e pronësisë së tij kundrejt shumës simbolike prej vetëm një euroje. Drejtuesit e klubit kanë kurorëzuar marrëveshjen me fondin e njohur britanik të investimeve “Park Bench”, i cili tashmë do të mbajë mbi supe edhe detyrimet e pashlyera financiare të institucionit sportiv. Kjo lëvizje vjen në një periudhë tejet të vështirë për Bordeaux, i cili pasi u gjend në një kolaps të rëndë ekonomik dhe dështori të përmbushte detyrimet e veta, u ndëshkua me përjashtim nga garat zyrtare. Për shkak të kësaj situate kritike në aspektin monetar, skuadra ka pësuar një rënie të lirë sportive, duke zbritur deri në kategorinë e gjashtë të futbollit në Francë. Megjithatë, kalimi te pronarët e rinj nuk sjell ende një garanci për rikthimin e menjëhershëm në fushat e blerta, pasi hapi i radhës kërkon dritën jeshile nga institucionet financiare dhe administrative kompetente. Organizmi mbikëqyrës do të marrë në shqyrtim strukturën e re pronësore, si dhe planin buxhetor të Bordeaux për edicionin 2026-27. Në rast se ky vendim del pozitiv, skuadra do të ketë mundësinë të garojë në Regional 1, ndërkohë që dosja do të kalojë për shqyrtim edhe në gjykatën tregtare për të nisur zyrtarisht procedurën e rimëkëmbjes. I themeluar në vitin 1881, Bordeaux ruan në palmaresin e tij një histori të pasur, ku spikasin gjashtë trofe të kampionatit të Francës.