Zbardhet plani i Jorge Jesus për Cristiano Ronaldon: Ja pse ylli portugez u la jashtë fushës

Pavarësisht nisjes së mbarë me dy fitore rresht nën drejtimin e trajnerit Jorge Jesus, atmosfera rreth Kombëtares së Portugalisë nuk paraqitet plotësisht e qetë. Vendimi për ta lënë Cristiano Ronaldon në stol gjatë gjithë takimit ndaj Norvegjisë (fituar 2-1), ndonëse sulmuesi u nxeh në fraksionin e dytë të lojës, ndezi debate të forta në shtypin vendas dhe detyroi Federatën Portugeze të Futbollit të reagojë. Në prag të sfidës së së enjtes kundër Danimarkës, mungesa e Ronaldos në seancën stërvitore me grupin – ku ai punoi i veçuar vetëm në palestër – nxiti konferencën e jashtëzakonshme për shtyp ku dolën kapiteni Rúben Dias dhe vetë trajneri Jorge Jesus. “Prioriteti ynë absolut është sfida në Kopenhagë. Duhet ta vlerësojmë maksimalisht këtë kundërshtar të fortë, sepse aspirata jonë është triumfi në Ligën e Kombeve. Unë nuk menaxhoj vetëm një futbollist, por një grup prej 23 lojtarësh”, u shpreh para gazetarëve strategu portugez. Duke iu drejtuar mediave, ai shtoi me ironi: “Për Ronaldon, një pyetje është pak, kurse tri janë shumë. Do të lejoj vetëm dy pyetje për të. Cristiano nuk përbën arsyen pse ndodhem këtu sot; fokusi kryesor është Danimarka dhe detyra ime si trajner i përfaqësueses”. Pavarësisht kësaj, tekniku sqaroi në detaje arsyet e vendimit të tij për kapitenin: “Është e vërtetë që pata një bisedë me të. Hartuam një strategji, njësoj siç veprova me Bruno Fernandesin, dhe i thashë se nuk do të aktivizohej as ndaj Norvegjisë dhe as ndaj Danimarkës”. Duke kujtuar bashkëpunimin e tyre të kaluar, Jesus shtoi: “Kam kaluar një vit duke punuar me Cris. Nuk u njohëm tri muaj më parë. Gjendjen e tij fizike e njoh në përsosmëri. Edhe gjatë kohës në Arabinë Saudite, kur luanim çdo tri ditë, ai rrallë aktivizohej në çdo ndeshje. Për më tepër, Cristiano nuk stërvitet kurrë në dy ditët e para pas një ndeshjeje”. Tekniku theksoi qartë se nuk ka pasur asnjë refuzim nga ana e lojtarit: “Që në grumbullimin e parë ai më tha: ‘Nëse duhet të luaj apo të qëndroj në stol, do të bëj atë që dëshiron trajneri’. Ai nuk ka kundërshtuar kurrë asnjë vendim”. “Ky ishte plani paraprak. Mbase mund të më ishte dashur në minutat e fundit të sfidës, por ecuria e lojës më diktoi një zgjedhje tjetër. Ky është i gjithë thelbi”, sqaroi më tej ai. Duke hedhur poshtë çdo aludim për ftohje raportesh nga koha kur bashkëpunonin te Al Nassr, Jesus u tregua i prerë: “Kemi një vit që njihemi profesionalisht, nuk ka asnjë krizë mes nesh. Mos kërkoni të sajoni drama ku nuk ka të tillë”. “Parimet e mia varen nga barazia; statusi nuk të jep trajtim të preferuar. Respekti ndaj karrierës së tyre ekziston, por unë marr vendimet përfundimtare pasi konsultohem me lojtarët dhe u shpjegoj planet e mia”, përfundoi trajneri Jorge Jesus.