Kthesë e papritur te Portugalia: Cristiano Ronaldo largohet nga grumbullimi pas deklaratave të trajnerit Jorge Jesus

Cristiano Ronaldo ka braktisur në mënyrë të bujshme kampin e Përfaqësueses së Portugalisë në Danimarkë, një zhvillim ky që vjen vetëm pak orë pasi selektori Jorge Jesus kishte mohuar çdo lloj fërkimi apo mosmarrëveshjeje mes tyre. Sipas informacioneve të fundit, ylli dhe kapiteni i historisë portugeze është nisur me avionin e tij privat drejt kryeqytetit spanjoll, Madridit. Ky largim i çastit ka ngritur pikëpyetje të mëdha se ky mund të jetë epilogu i rrugëtimit të tij me fanellën kombëtare, ndërkohë që ekipit i kishin mbetur edhe dy takime të tjera për t'i luajtur në kuadër të këtij cikli të Ligës së Kombeve. Ngjarja ka marrë një rrjedhë dramatike pak minuta pasi trajneri Jorge Jesus – i cili më parë ka bashkëpunuar me Ronaldon te Al Nassr, ku fituan së bashku titullin kampion në Arabinë Saudite – kishte garantuar para mediave se marrëdhënia e tyre është e shkëlqyer dhe se nuk ekziston asnjë krizë. Madje, strategu portugez kishte paralajmëruar se sulmuesi do të zbarkonte në fushën e stërvitjes gjatë ditës së mërkurë në Kopenhagë, duke arsyetuar mungesat e mëparshme me regjimin e përgatitjeve. "Dje ai nuk refuzoi të stërvitej. Francisco Conceição nuk u stërvit për shkak të dëmtimit, as João Félix, sepse po përpiqeshim të lehtësonim lodhjen, ndërsa Cristiano Ronaldo bëri punë në palestër. Ai do të stërvitet sot. Është dita e katërt, kështu që do të stërvitet", kishte deklaruar Jesus. Megjithatë, situata ndryshoi rrënjësisht brenda pak orësh. Në një prononcim tjetër, trajneri Jesus pranoi se kishte ndërtuar një plan specifik për lojtarin, duke i komunikuar hapur se nuk do të aktivizohej si titullar në sfidat ndaj Norvegjisë dhe Danimarkës. Pas këtyre zhvillimeve, Ronaldo është parë duke u larguar nga stadiumi “Parken” i transportuar me një furgon të zi zyrtar të Federatës Portugeze të Futbollit. Tekniku portugez kishte bërë të to ditur se mbrëmjen e së martës kishte pasur një ballafaqim kokë më kokë me sulmuesi, duke lënë të kuptohet se çështja ishte mbyllur para kohës së darkës. Megjithatë, ai nuk la vend për interpretime sa i përket autoritetit absolut në krye të skuadrës. "Unë mund të premtoj çfarë të dua. Unë jam trajneri. I thashë lojtarit se nuk do të luante. Do ta vendos në stol. Nëse kam nevojë për të për 30 minuta, do të luajë; nëse jo, nuk do të luajë", ishte shprehur prerazi Jesus. "Asnjë lojtar nuk do të më bëjë ta ndryshoj mendimin tim. As ai, as askush tjetër në futboll. Asnjë president. Kurrë, absolutisht askush", pati shtuar në fund trajneri i kombëtares.