Sulmuesi legjendar francez, Olivier Giroud paralajmëron pensionimin nga futbolli

Sulmuesi i njohur, Olivier Giroud, ka nisur të mendojë seriozisht për mbylljen e rrugëtimit të tij të gjatë në fushat e blerta, teksa po afron dita e 40-vjetorit të lindjes. Gjatë një rrëfimi për të përditshmen prestigjioze “L’Équipe”, lojtari i Lillet ka pranuar hapur se ky edicion sportiv mund të rezultojë i fundit për të si profesionist. Duke folur për planet e së ardhmes, kampioni i botës me fanellën e Francës në vitin 2018 u shpreh se po përpiqet të vlerësojë çdo sekondë të mbetur në fushë, duke lënë të kuptohet se fundi është afër. E ardhmja e tij në futboll nisi zyrtarisht në vitin 2006, kur bëri paraqitjen e tij të parë si profesionist në Ligue 2 me fanellën e Grenoble. Më pas, rrugëtimi i tij njohu ngritje të bujshme, duke nisur nga periudha te Montpellier, me të cilët shkroi historinë duke fituar titullin e Ligue 1 më 2012, për të vijuar më tej te skuadra të mëdha si Arsenali, Chelsea, Milani, Los Angeles FC dhe së fundmi Lille. Gjatë kësaj karriere të lavdishme dhe të pasur me trofe, bomberi francez ka ngritur lart trofeun e Ligue 1 me Montpellier, Serie A me Milanin, Ligën e Kampionëve dhe Ligën e Evropës me Chelsean, si dhe katër trofe të FA Cup gjatë kohës te Arsenali. Koleksionit të tij i është shtuar edhe US Open Cup, të cilën e fitoi gjatë eksperiencës me Los Angeles FC. Sa i përket karrierës me kombëtaren “Les Bleus”, nga e cila i dha lamtumirën në vitin 2024, Giroud ka regjistruar 137 paraqitje zyrtare dhe ka tundur rrjetën 57 herë, ndërsa momenti më kulmor i këtij rrugëtimi mbetet padyshim triumfi i lavdishëm në Kampionatin Botëror të vitit 2018. Nëse paralajmërimi i tij do të shndërrohet në vendim zyrtar, futbolli do t'i japë lamtumirën një prej sulmuesve më konstantë të dy dekadave të fundit, i cili lë pas një trashëgimi tëjashtëzakonshme të mbushur me suksese, rekorde dhe lavdi ndërkombëtare.